Lögregla handtók Grænfriðungana

Norska lögreglan fór í nótt um borð í borpallinn Transocean Spitsbergen í Barentshafi og batt enda á mótmæli Greenpeace. Síðustu sjö liðsmenn samtakanna voru fjarlægðir af pallinum og fluttir með þyrlu á lögreglustöð í Tromsö í Norður-Noregi. Áður höfðu átta aðgerðarsinnar Greenpeace gefist upp af sjálfsdáðum og þegið boð um þyrluflug til Hammerfest. 

Samkvæmt fréttum norskra fjölmiðla gekk lögregluaðgerðin snurðulaust og án átaka. Sérsveitarmenn lögreglu þurftu að síga niður í böndum til að ná Grænfriðungunum. Norsk stjórnvöld höfðu áður fengið samþykki yfirvalda á Marshall-eyjum til að lögregla mætti fara um borð en þar er borpallurinn skráður. Hann er í eigu Transocean, sem er verktaki hjá Statoil.

Greenpeace segir að öllum hafi nú verið sleppt úr haldi lögreglu án ákæru. Samtökin segjast ekki hætt aðgerðum á svæðinu. Þau segjast ætla að halda skipi sínu, Esperanza, nákvæmlega á fyrirhuguðum borstað til að hindra að Statoil gefi hafið þar boranir. 

Það var á þriðjudag sem fimmtán meðlimir Greenpeace réðust til uppgöngu á borpallinn til að mótmæla olíuleit á norðurslóðum. Þeir hlekkjuðu sig fasta og héngu í böndum utan á pallinum.

Borsvæðið er um 350 kílómetra norðan við Hammerfest en Statoil áformar að bora þar þrjár holur í sumar, sem verða þær nyrstu til þessa í sögu olíuleitar á heimskautasvæðum. Þær eru engu að síður mjög langt frá hafísjaðrinum. Samkvæmt nýjasta hafískorti norsku veðurstofunnar eru 250-300 kílómetrar frá borsvæðinu að ísjaðrinum.