Falur formaður og Jón Norðdal stjórna Keflavíkurliðinu á morgun

Keflvíkingar byrja úrslitakeppni Dominos-deildar karla í körfubolta með þjálfarann sinn í leikbanni og ofan á það er aðstoðarþjálfarinn staddur erlendis.

Andy Johnston var rekinn út úr húsi í síðustu umferð deildarkeppninnar og verður í banni annað kvöld þegar Keflavík tekur á móti Stjörnunni í fyrsta leik í einvígi liðanna í átta lið úrslitum.

Gunnar H. Stefánsson er aðstoðarþjálfari Andys en verður fjarri góðu gamni því hann er staddur erlendis vegna vinnu sinnar. Það var ljóst frá því í haust að Gunnar gæti ekki verið með í þessum leik.

Keflvíkingar hafa hinsvegar fundið mennina sem ætla að redda málunum í þessum fyrsta leik en það eru formaðurinn Falur Harðarson og Jón Norðdal Hafsteinsson, fyrrum leikmaður karlaliðsins og þjálfari drengjaflokks félagsins. Þeir munu stjórna liðinu saman í TM-höllinni á morgun.

Jón Norðdal hefur ekki stýrt karlaliði Keflavíkur áður en Falur gerði liðið að Íslandsmeisturum árið 2004 í samstarfi með Guðjóni Skúlasyni.