Radíó Stam fer í loftið í kvöld

Málbjörg - félag um stam á Íslandi stendur fyrir tímabundinni útvarpsstöð sem byrjar útsendingar í kvöld klukkan 20:00. Radíó Stam FM 98,3. Markmið útvarpsstöðvarinnar er að auka sýnileika stams í samfélaginu og skapa jákvæða umræðu um þátttöku þeirra sem glíma við talmein í ljósvakamiðlum.

Þetta kemur fram í tilkynningu frá Málbjörgu.

Útvarpsstöðin mun vera í loftinu í einn mánuð og verða þættir hennar viðtalsþættir í formi tveggja manna tals við þjóðþekkta landsmenn. Nú þegar hafa fjölmargir á sviði viðskipta, menntamála, stjórnmála og lista í samfélaginu staðfest komu sína.

Að jafnaði verður dagskrá útvarpsstöðvarinnar tvisvar á dag. Alla virka morgna frá átta til níu og virk kvöld frá átta til níu. Þá verða upptökur af þáttum gerðar aðgengilegar á netinu.

Árni Heimir Ingimundarson, formaður Málbjörgar, verður þáttastjórnandi en hann hefur glímt við stam frá blautu barnsbeini. Fyrsti gestur Radíó Stam verður Hilmar Örn Hilmarsson, allsherjagoði og tónskáld.