„Hefur ekkert með ritskoðun að gera“

Sunna Gunnars Marteinsdóttir, aðstoðarkona utanríkisráðherra vísar öllum ummælum um að utanríkisráðherra stundi ritskoðun á bug.

Gunnar Bragi Sveinsson utanríkisráðherra er nú staddur úti á Leifsstöð en hann mun taka þátt í ráðstefnu í London á morgun, á vegum The Economist, um norðurslóðamál. Hann kom því ekki við að veita Vísi viðtal vegna máls sem hefur valdið verulegum skjálfta meðal blaðamanna en RÚV greindi frá því í frétt í dag að Gunnar Bragi vilji ekki tala við RÚV nema að uppfylltum skilyrðum. Ingimar Karl Helgason blaðamaður hefur þegar skrifað um málið harðorðan pistil þar sem segir meðal annars: „Fulltrúar framsóknarflokksins og sjálfstæðisflokksins hafa haldið úti linnulausum árásum á almannaútvarpið. Ýmist með yfirlýsingum, hótunum eða beinum aðgerðum.“

Hér má sjá hvernig samskipti ráðherra og fréttamanns RÚV, Kára Gylfasonar, voru. Það reyndist engum vandkvæðum bundið fyrir Heimi Má Pétursson fréttamann Stöðvar 2 að fá viðtal við Gunnar Braga. Þetta mun þó aðeins ná yfir brot af samskiptum ráðherra og fréttastofu en Óðinn Jónsson fréttastjóri RÚV heldur því fram að utanríkisráðherra hafi synjað Ríkisútvarpinu um „viðtal nema að hann fái eintak af því í heild, óklippt, eða viðtalið verði sent út beint. Óskað var eftir viðtali um ástandið í Úkraínu.“

Sunna Gunnars Marteinsdóttir aðstoðarkona ráðherra er í för með Gunnari Braga. Hún sagði í samtali við Vísi að ekki væri um að ræða ritskoðun að neinu leyti. „Þetta snýst að engu leyti um að ritskoða RÚV,“ segir Sunna og vísar til þess að ráðherra hafi einfaldlega verið ósáttur við frétt sem birtist fyrir helgi. Gunnari Braga fannst fréttamaður fara illa með það sem hann sagði þá.

Og með það voru þau flogin.