FME áfrýjaði ekki dómi Héraðsdóms Reykjavíkur

Fjármálaeftirlitið (FME) kaus að áfrýja ekki dómi Héraðsdóms Reykjavíkur frá því í byrjun desember um að stofnuninni bæri að greiða Ingólfi Guðmundssyni, fyrrverandi framkvæmdastjóra Lífeyrissjóðs verkfræðinga,  sjö milljónir króna vegna fjártjóns, eina milljón í miskabætur og níu hundruð þúsund í málskostnað.

„Ákvörðun um það var byggð á hagsmunamati varðandi málið í heild sinni, þar á meðal varðandi fjárhagslega hagsmuni stofnunarinnar,“ segir í svari FME við fyrirspurn fréttastofu. Þar segir að stjórn FME hafi fjallað um málið á fundi sínum 22. janúar síðastliðinn, en áfrýjunarfrestur rann út 4. mars.

Forsaga málsins er sú að eftir að Ingólfur var ráðinn framkvæmdastjóri Lífeyrissjóðs verkfræðinga í byrjun árs 2010 tók stjórn FME þá ákvörðun í ágúst sama ár að hann uppfyllti ekki hæfisskilyrði laga um skyldutryggingu lífeyrisréttinda. Eftir það fór FME fram á að stjórn lífeyrissjóðsins sæi til þess að hann gegndi ekki stöðunni áfram. Nokkrum dögum síðar var tilkynnt um að Ingólfur hefði látið af störfum sökum ákvörðunar FME. Ingólfur fór þá í mál við stofnunina og dómur í því máli féll í janúar 2012 þar sem Héraðsdómur Reykjavíkur dæmdi ákvörðun stofnunarinnar ógilda. Þá fór Ingólfur í skaðabótamál og dómur í því máli féll þann 4. desember síðastliðinn og eins og áður segir ákvað FME að áfrýja ekki þeirri niðurstöðu Héraðsdóms.

„Eftir um fjögurra ára slag þar sem bæði dómstólar og Umboðsmaður Alþingis hafa í tvígang dæmt ákvarðanir FME ólögmætar og gert alvarlegar athugasemdir við framgöngu starfsmanna embættisins, þá kemur mér ekki á óvart að núverandi stjórn FME hafi ákveðið að áfrýja ekki skýrri niðurstöðu Héraðsdóms Reykjavíkur i skaðabótamálinu sem ég vann þann 4. desember síðastliðinn,“ segir Ingólfur í samtali við fréttastofu.

„Það er ekki skemmtileg lífsreynsla að upplifa misnotkun opinbers valds og að embættismenn fari fram með ósannindi. Enginn hefur beðið mig afsökunar og enn er að finna á heimasíðu FME meiðyrði í minn garð. Eftir stendur að vita hver ætlar að axla ábyrgð á lögbrotum FME í minn garð,“ segir Ingólfur.