Umræður fram eftir nóttu á Alþingi

Umræður um skýrslu utanríkisráðherra um Evrópusambandið stóðu til klukkan að ganga fjögur í nótt og voru þónokkrir enn á mælendaskrá þegar fundi var frestað. Verulegur hluti fundartímans fór í umræður um störf þingsins, sem sumir kalla málþóf.

Þingfundur hefst á ný klukkan hálf ellefu með óundirbúnum fyrirspurnum og svo heldur umræðan um Evrópumálin áfram. Stjórnarandstæðingar vildu að fundinum yrði frestað í gærkvöldi, en Einar K. Guðfinnsson forseti Alþingis tilkynnti laust fyrir miðnætti að fundarhöldum yrði haldið áfram inn í nóttina.

Stjórnarandstæðingar bentu á að með þessu vinnulagi væri meira að segja verið að brjóta svonefnd vökulög, sem sett voru um vinnutíma um borð í íslenskum togurum snemma á síðustu öld, en allt kom fyrir ekki.

Klukkan sex í morgun höfðu tæplega 35 þúsund manns skrifað undr áskorun til Alþingis á vefnum Þjóð.is, um að halda þjóðaratkvæðagreisðlu um málið.