Skrýtið að Færeyingar fái ekki svör um flugið

Formaður Færeyingafélagsins í Reykjavík undrast að ekki hafi fengist svör um það hvort nýjustu þotur Færeyinga megi lendi á Reykjavíkurflugvelli. Færeyjaflugið fluttist í dag tímabundið til Keflavíkur, sem gæti verið fyrsti vísir að endanlegu brotthvarfi flugs frændþjóðar okkar úr höfuðborginni.

Í hálfa öld hefur Færeyjaflugið farið um Flugfélagsafgreiðsluna  á Reykjavíkurflugvelli. Það kom hins vegar engin Færeyjavél í dag, hún lenti í Keflavík. Þótt þessi breyting sé núna hugsuð út þennan mánuð gæti svo farið að það verði stutt í að Færeyjaflugið hverfi alveg frá Reykjavík.

Færeyska félagið Atlantic Airways hefur í aldarfjórðung notað 95 sæta British Aerospace-þotur. Félagið á hins vegar bara eina slíka vél eftir, og stefnir að sölu hennar, en þar sem hún verður frá vegna viðhalds næstu vikur vildi það í staðinn fá að nota nýja 132 sæta Airbus A-319 þotu. Forstjóri færeyska flugfélagsins sagði Stöð 2 í fyrra að ósk um að nota Airbus þotuna hafi fyrst verið kynnt flugvallaryfirvöldum í Reykjavík fyrir einu og hálfu ári. Flugfélag Íslands ítrekaði óskina í fyrravor og aftur í haust, án þess að svör hafi fengist. 

Formaður eina Færeyingafélagsins á Íslandi, Guðrið Helena Petersen, undrast að ekki sé svarað. 

„Mér finnst það mjög skrýtið. Það er eins og þessu sé bara velt fram og til baka. Það er enginn sem ætlar að taka ábyrgð á að svara fyrir þetta,” segir Guðrið Helena. Hún kveðst raunar ekki skilja hversvegna Færeyingar megi ekki skipta um þotutegund. „Ég er allavega ekki búin að átta mig á hvað málið sé.” 

Samkvæmt upplýsingum aðstoðarmanns innanríkisráðherra er svars að vænta í þessari viku.

Þrátt fyrir ýmsa kosti við að tengjast Keflavík telur formaður Færeyingafélagsins að þeir séu fleiri sem vilji hafa flugið áfram í Reykjavík. 

„Fyrir Færeyinga sem koma til Íslands og eru að fara á spítalann til dæmis, þá er stutt á spítalann,” segir hún. Færeyingar sem komi í helgarferð að skemmta sér njóti þess einnig að stutt sé í miðborgina frá flugvellinum. 

 „Ég held að margir séu sammála mér um að það yrði bara þægilegast að hafa þetta hérna, eins og það hefur alltaf verið, í Reykjavík,” segir formaður Færeyingafélagsins í Reykjavík.