Íslendingur ruddist upp á svið til Taylor Swift

Það varð uppi fótur og fit á tónleikum poppstjörnunnar Taylor Swift á laugardagskvöldið þegar hún tróð upp í O2 höllinni í London. Þegar hún hafði nýlokið við síðasta lag kvöldsins ruddist ungur maður upp á svið til hennar.

Breska blaðið The Mirror fullyrðir í frétt sinni um málið að ungi maðurinn sé Íslendingur sem hafi gert sér ferð til Englands í þeim tilgangi að ná athygli stjörnunnar. Öryggisverðir náðu í skottið á manninum eftir að honum hafði tekist, að því er virðist, að láta Swift fá skilaboð á miða og segir blaðið að á miðann hafi hafi hann skrifað netfang sitt.

Hann var handsamaður og leiddur í fylgd öryggisvarða út úr höllinni eins og sjá má á meðfylgjandi mynd. Talsmaður hallarinnar segist harma atvikið og að málið sé nú á borði lögreglunnar.