Fjöldi á formlegri opnun í Hafnarhúsinu

Meðfylgjandi myndir voru teknar um helgina þegar sýningin Hljómfall litar og línu var formlega opnuð í Listasafni Reykjavíkur, Hafnarhúsi. Fjöldi manns mætti á sýninguna sem snýst um myndlistarverk í anda „sjónrænnar tónlistar“ eða visual music en á henni eru verk eftir rúmlega þrjátíu listamenn.

Sýningin er þrískipt en í fyrsta hluta hennar eru sýnd lykilverk eftir helstu frumkvöðla sjónrænnar tónlistar, Viking Eggeling,ThomasWilfred, Oskar Fischinger og bræðurna John og James Whitney. Verkin gefa hugmynd um sögulegt baksvið listgreinarinnar. 

Annar hluti sýningarinnar samanstendur af verkum eftir íslenska og erlenda samtímalistamenn. Meðal verka er ný innsetning, Trajectories, eftir Sigurð Guðjónsson og Önnu Þorvaldsdóttur.

Þá verður sýnt verkið DeCore (aurae), eftir listamanninn Doddu Maggý og valin verk eftir bandaríska listamanninn Jeremy Blake. Einnig verða sýnd verðlaunaverk frá sjónrænu tónlistarhátíðinni. Jón Proppé er sýningarstjóri þriðja hluta sýningarinnar sem samanstendur af minni verkum eftir rúmlega 20 listamenn. Þeirra á meðal eru verk eftir Dieter Roth, Svavar Guðnason,Margréti Blöndal, Önnu Jóelsdóttur og Kjarval. Verkin sýna hvernig hugmyndir um samhengi myndlistar og tónlistar þróuðust hér á landi.

Sýningarstjórar eru Hafþór Yngvason, Yean Fee Quay og Jón Proppé.