Toppiði þetta - 100 þúsund krónum ríkari

Alexandra Kristjánsdóttir sem hefur undanfarin tvö ár búið í Bretlandi á suðurströndinni rétt við Bournemouth tók bílprófið án athugasemda og vann sér þar af leiðandi inn tæpar 100 þúsund íslenskar krónur. Við heyrðum stuttlega í Alexöndru og móður hennar, Elfu Thorsteins.

Þakkar ökukennaranum 

„Ég var bara með ótrúlega góðan ökukennara sem gerði þetta allt svo skemmtilega,“ svarar Alexandra spurð um bílprófið sem hún náði upp á tíu. „Svo finnst mér líka svo gaman að keyra, og er það ekki alltaf þannig að maður er betri á þeim sviðum sem maður hefur áhuga á?“

Mamma stolt af stelpunni

Þegar við spyrjum Elfu móður Alexöndru um viðurkenninguna segir hún: „Þetta þykir mjög mikið mál hérna úti að minnsta kosti og það er að koma frétt um þetta í the Daily Echo á næstu dögum skilst mér. Pabbi hennar fór með henni í einn ökutíma seint í haust og fékk að sitja sem farþegi í aftursætinu. Hún var að ræða við ökukennarann hvort hann ætti að vera viðstaddur í prófinu hennar eða ekki því hún vildi endilega hafa hann með.  Þegar hann spurði hana hvers vegna svaraði mín um hæl að hún vildi sjá svipinn á honum þegar hún ynni 500 pundin.“

Kennarinn missti sig í aftursætinu

„Okkur fannst þetta auðvitað bara fyndið því það hefur enginn unnið þau síðastliðin þrjú ár en svo bara gerði pían það í vikunni og svipurinn á kennaranum var víst eitthvað til að muna eftir því hann missti sig í aftursætinu. Þau komu hérna heim þvílíkt „high“. Það er mikill heiður fyrir hann að hafa nú í ferilskránni að hafa nemanda sem hefur tekið próf án athugasemda,“ segir Elfa.