Helköttuð á leiðinni á Arnold Classic

Heimsbikarmeistarinn Aðalheiður Ýr Ólafsdóttir, 29 ára, heldur ásamt fleiri Íslendingum til Ohio í Bandaríkjunum á Arnold Classic fitnessmótið sem fram fer 27. febrúar til 2. mars. Við spurðum Aðalheiði um undirbúninginn fyrir mótið.

Keypti líkamsræktarkort á unglingsárunum

„Ég hef alltaf verið í einhverjum íþróttum. Ég var í ballett og jazzballett í tólf ár og æfði frjálsar á sumrin. Svo þegar ég var sextán ára keypti ég kort í World Class en passaði mig að lyfta ekki of þungt heldur mætti ég aðallega í tíma. Ég horfði á mitt fyrsta fitness- og vaxtarræktarmót árið 2008 en það var þá sem ég smitaðist strax. Þá sá ég módelfitness flokkinn og ég hef ekki stoppað síðan,“ segir Aðalheiður sem keppti ári síðar á bikarmótinu í fitness hér á landi þar sem hún landaði 3. sætinu.

Titlarnir margir

Hvað hefur þú unnið marga titla síðan þá? „Ég var í 3. sæti á mínu fyrsta móti en ég hef alltaf náð að komast á verðlaunapall. Árið 2012 var metárið mitt en þá varð ég í 2. sæti á Arnold Classic í Bandaríkjunum og Íslandsmeistari hér heima en ég flaug út til Dannmerkur nóttina eftir að ég varð Íslandsmeisari og keppti þar á móti sem heitir Loaded Cup sem ég vann svo líka,“ segir hún og heldur áfram upptalningunni:

„Ég keppti svo þremur mánuðum seinna í Budapest og varð heimsbikarmeistari þar árið 2012. Svo varð ég í 6. sæti á Arnold mótinu í Evrópu sama ár og mánuði seinna varð ég bikarmeistari hér heima og heildarsigurvegari á því móti en mesti heiðurinn var að fá stærsta bikarinn í hús þegar ég var valin Íþróttmaður ársins hjá IFBB á Íslandi þetta sama ár.“

Aðalheiður og þjálfarinn hennar Konráð Valur Gíslason.

Sunnudagarnir eru heilagir

„Ég æfi allt árið sirka 5-6 sinnum í viku. Þegar ég er að undirbúa mig fyrir mót, sem við köllum niðurskurð, þá æfi ég tvisvar á dag fimm sinnum í viku. Ég tek síðan eina æfingu á laugardögum en hvíli mig alltaf á sunnudögum þeir eru heilagir hvíldardagar hjá mér.“

„Þar sem ég keppti svona mikið árið 2012 fann ég hvað líkaminn var þreyttur. Ég þurfti að fá smá hvíld en ég tók mér keppnispásu árið 2013 en æfði samt strangt og byrjaði svo núna í byrjun desember í niðurskurði fyrir Arnold Classic í febrúar,“ segir hún.

Hér skrifar Aðalheiður undir samninginn við QNT.



Borðar sex máltíðir á dag

Hvað borðar þú í niðurskurðinum? „Ég borða 5-6 mátíðir á dag. Allir morgnar byrja á hafragraut. Borða alltaf á Nings hádeginu og svo fæ ég fisk frá fiskversluninni Hafinu í kvöldmat. Ég borða mikið af eggjum og tek fæðubótarefni og vítamín frá QNT. En ég gerði einmitt á dögunum stóran samning við core.is sem flytur inn þessar frábæru gæðavörur frá QNT,“svarar Aðalheiður.

„Í byrjun desember gerði ég samning við eigendurna úti þar sem ég verð í auglýsingum fyrir þá um heim allan og þeir munu koma til með að senda mig á expo-sýningar að kynna fyrir þá vörurnar. Ég er ekkert smá stolt af því þetta eru frábærar hágæðavörur í heimsklassa. Án stuðningsaðilanna væri þetta erfitt fjárhagslega þannig að ég er heppin hvað það varðar.“

Vel stemmd fyrir Arnold

„Ég er rosalega spennt og vel stemmd fyrir mótinu í febrúar. Undirbúningurinn gengur eins og í sögu og tel ég mig vera í mínu besta formi til þessa enda hef ég besta þjálfarann við hlið mér í þessum undirbúningi sem er Konráð Valur Gíslason einkaþjálfari í World Class Laugum. Hann styður mig alla leið. Hann ætlar að koma út með mér á mótið,“ segir hún að lokum.

Heidi Ola kallar Aðalheiður sig vestan hafs.