Saga Garðars og Ásdís Rán í kappakstri

Leikkonan Saga Garðarsdóttir keppir með alþingismanninum Guðlaugi Þór Þórðarsyni í Helvítis djöfulsins keppninni í Á fullu gazi á Stöð 2 í kvöld klukkan 20.05.

Saga er ekki með bílpróf og fer á kostum í keppninni þar sem hún keyrir meðal annars út af brautinni.

Saga og Guðlaugur mynda liðið Hógvær en best og mæta þau Bjútíbollunum Ásdísi Rán Gunnarsdóttur og Fjölni Geir Bragasyni.

Í kvöld verður boðið uppá tvöfaldan skammt af keppninni og mæta Ökuhrottarnir Sigurður Eggertsson og Ragnheiður Eiríksdóttir Gulu Þruminni sem að samanstendur af fjölmiðlakonunni Láru Ómarsdóttir og alþingismanninum Óttari Proppé.



Þá fer Sigríður Elva og kynnir sér hvernig það sé að keyra gokart bíla og mótorkross hjól á ísilögðu Hafravatni. Strákó og Skurðstofan rembast einnig við að klára skrjóða sína og koma þeim í sprautun á réttum tíma.