Öskurklefi afhentur borgarstjóra

Sviðslistahópurinn Shalala afhendir borgarstjóra svokallaðan Öskurklefa við hátíðlega athöfn í Ráðhúsi Reykjavíkur miðvikudaginn 22. janúar klukkan 15:30.

Öllum formönnum stjórnmálaflokka er boðið að vera viðstaddir. Ólafur Darri Ólafsson, leikari, og Erna Ómarsdóttir dansari afhenda borgarstjóra klefann fyrir hönd Shalala.

„Klefanum er ætlað að hjálpa pólitíkusum að taka réttar ákvarðanir,“ segir Erna Ómarsdóttir. „Þegar maður öskrar þá skýrist allt fyrir manni. Pólitíkusar geta nýtt sér þetta.“

Ekki er hætta á að klefinn raski vinnufriði í ráðhúsinu, því klefinn er hljóðeinangraður. 

„Það er erfitt að öskra úti á götu af því að þá heldur fólk að maður sé klikkaður og maður á jafnvel á hættu að vera handtekinn. Klefarnir eru hentugir staðir þar sem mönnum leyfist að öskra.

Að okkar mati ættu svona klefar að vera út um allt. Samfélagið væri betra ef menn fengju að öskra í friði og koma út úr klefanum sem nýir menn.“

Meiningin er að gefa bæði Alþingi og borgarstjóra klefa. „Við vitum þó ekki hvort eða hvenær Alþingi tekur við honum,“ segir Erna.

Klefinn verður til sýnis í ráðhúsinu næstu vikur.

Öskurkassar eru hluti af sýningunni Inn að beini. „Það er aukasýning á henni í Þjóðleikhúsinu á föstudaginn. Ef menn kaupa miða á Inn að beini fá þeir ókeypis prufutíma í metal-eróbikki, sem er líka stresslosandi tegund af leikfimi. Hún er aðeins meira brútal en önnur leikfimi.“

Hér má kaupa miða á sýninguna Inn að beini.