Svona kemurðu í veg fyrir túrverki

Vignir Þór Bollason er nemandi við Life University í Atlanta í Bandaríkjunum. Hann er þar í doktorsnámi í kírópraktík og skrifar áhugaverða færslu á bloggið sitt um hvernig hægt sé að koma í veg fyrir tíðarverki.

„Ég heyrði frásögn mjög farsæls doktors í Kírópraktík í dag þar sem hann talaði um hvernig konur geta komið í veg fyrir túrverki án þess að taka verkjalyf eða önnur lyf. Oftast taka konur verkjalyf við túrverkjum 2-3 yfir daginn og það í jafnvel 3-4 daga. Ef konur taka verkjatöflur frá kynþroska og fram á þrítugsaldurinn (segjum í 10 ár) þá erum við að tala um 96-120 töflur sirka á ári eða um 1000 töflur af verkjalyfjum á 10 árum. Það er ekki bara mikill kostnaður sem því fylgir heldur líka getur þetta valdið skemmdum í nýrum,“ skrifar Vignir. Hann bætir við að konur ættu að sleppa öllum dýraafurðum nokkrum dögum fyrir tíðar.

„Þessi doktor sagði okkur frá því hvað hann hefur séð margar konur losna við túrverki með mjög einföldu ráði, en segir að það hafi þó ekki virkað fyrir allar konur. Því mundi það ekki skaða að prófa þetta. Hann segir sem sagt að 3-4 dögum áður en konur fara á túr eigi þær að sleppa öllum mat sem kemur frá dýrum, aðallega rauðu kjöti sem og öðru kjöti m.a. fisk og sniðganga allar mjólkurvörur. Í staðinn borða kornvörur (grains), ávexti, grænmeti og drekka nóg vatn í þessa 3-4 daga áður en blæðingar byrja. Þetta einfalda ráð hefur komið í veg fyrir túrverki hjá fjölda kvenna.“

Viktor vonar að bloggfærslan eigi eftir að hjálpa einhverjum konum og leyfði birtingu færslunnar á Lífinu á Visir.is.

„Ég er ekki að neyða neinn til að gera þetta heldur bara að reyna að miðla þessu ráði, en af frásögnum að dæma þá hefur þetta virkað fyrir margar konur. Margar voru svo hamingjusamar að þær komu hlaupandi í átt að honum næst þegar þær sáu hann til að þakka fyrir. Ég vona að þetta virki fyrir þig ef þú prófar þetta. Mér þætti gaman að fá að heyra af þessu sjálfur ef ég þyrfti að díla við túrverki mánaðarlega en þar sem ég get ekki prófað þetta sjálfur og sagt ykkur hvort þetta virkar eða ekki verð ég að deila þessu með ykkur. Vona að þetta eigi eftir að hjálpa einhverjum konum.“