Stórleikur Helenu ekki nóg | Miskolc úr leik

Ungverska liðið Aluinvent Miskolc tapaði fyrir Istanbul Universitesi í síðari viðureign liðanna í 16-liða úrslitum EuroCup kvenna í dag og er úr leik. Helena Sverrisdóttir átti þó stórleik fyrir Miskolc.

Tyrkirnir unnu stórsigur í fyrri leiknum, 87-55, í Ungverjalandi og var því í sterkri stöðu fyrir fyrri leikinn á heimavelli í dag.

Istanbul fór illa með Helenu og félaga í fyrsta leikhluta en liðið skoraði þá 30 stig gegn ellefu. Gestirnir náðu aðeins að rétta sinn hlut eftir það en niðurstaðan var sex stiga sigur heimaliðsins.

Helena var stiagahæst í liði Miskolc með 33 stig auk þess sem hún tók sjö fráköst, stal boltanum þrívegis og gaf eina stoðsendingu. Hún lék í alls 35 mínútur.

Hún náði sér illa á strik í fyrri leik liðanna en þá klikkaði hún á öllum þrettán skotum sínum.