Þurfa að losa sig við 100 karlmenn til að uppfylla lagaskilyrði

Konur voru um 31% stjórnarmanna í íslenskum fyrirtækjum með fleiri en 50 heilsársstarfsmenn í árslok 2013. Hlutfall karla var 69%. Þetta kemur fram í nýrri úttekt Creditinfo.

Breytingar á lögum um hluta- og einkahlutafélög sem ætlað er að tryggja að aðalfundir taki mið af kynferði stjórnarmanna tóku gildi þann 1. september síðastliðinn. Þau hafa því verið í gildi í rúman fjóran og hálfan mánuð. Lögin ná til 287 íslenskra fyrirtækja, en af þeim uppfylla 152 fyrirtæki skilyrði laganna.

Í lögunum kemur fram að í stjórn hlutafélaga, þar sem starfa fleiri en 50 starfsmenn að jafnaði á ársgrundvelli, skuli hvort kyn eiga fulltrúa í stjórn þegar stjórn er skipuð þremur mönnum og þegar stjórnarmenn eru fleiri en þrír í slíkum félögum skuli tryggt að hlutfall hvors kyns sé ekki lægra en 40%.

Í árslok 2009 uppfylltu 23% fyrirtæki skilyrði laganna, eða 64 fyrirtæki af 273.

Í úttektinni kemur fram að ætli íslensk fyrirtæki sér að ná að uppfylla skilyrði laganna þurfa þau að kjósa inn 100 konur á kostnað karla sem eru fyrir í stjórnum þeirra fyrirtækja sem lögin ná til.

Markmiðið náist á þessu ári

Þorsteinn Víglundsson, framkvæmdastjóri Samtaka atvinnulífsins, segir ljóst að miðað hafi talsvert í rétta átt og að hlutfall hafi hækkað þónokkuð á stuttum tíma, þó vanti nokkuð uppá til að hinu lögbundna 40 prósenta markmiði verði náð.

„Við fórum í þessa athugun af tveimur ástæðum. Annars vegar með hliðsjón af samningi okkar við viðskiptaráð og Félag kvenna í atvinnurekstri frá árinu 2009 sem fól í sér markmið um að hlutfall hvors kyns yrði ekki undir 40% í lok árs 2013. Hins vegar vildum við vekja athygli á þessu í aðdraganda aðaldfunda fyrirtækja sem eru framundan. Við bindum vonir við að verða komin yfir 40% markmiðið á þessu ári,“ segir Þorsteinn.