Söngleikir, leyndardómar og samkynhneigð

Verkmenntaskólinn á Akureyri

„Leikfélagið okkar heitir Yggdrasill og í vetur ætla þau að setja upp leikritið 101 Reykjavík eftir Hallgrím Helgason,“ segir Stefanía Tara Þrastardóttir, formaður Þórdunu, nemendafélags Verkmenntaskólans á Akureyri, en flestir muna eftir kvikmyndinni sem gerð var eftir bók Hallgríms. „Við fáum flottan leikstjóra hann Jón Gunnar Þórðarson, en hann hefur áður sett upp Rocky Horror, Ræflavík og Lísu og Lísu hjá Leikfélagi Akureyrar. Við stefnum svo að því að frumsýna 24. október, þetta verður gaman og við hlökkum mikið til að setja upp flotta sýningu.“

Menntaskól­inn á Ísafirði

„Það er ekki búið að negla niður hvaða verk við ætlum að sýna en valið stendur á milli Beetlejuice, Rock of ages eða Mamma mia!,“ segir Ísak Emanúel Róbertsson í Nemendaráði MÍ. „Við sýnum leikritð alltaf í svokallaðri Sólrisuviku, en það er menningar- og listavika sem nemendur skólans sjá um. Við tilkynnum hvaða verk verður fyrir valinu fljótlega og hefjast æfingar í nóvember. Frumsýnt er Sólrisuvikunni í mars,“ segir Ísak.

Menntaskól­inn í Reykjavík

Rakel Björk Björnsdóttir, formaður Herranætur, leikfélags Menntaskólans í Reykjavík, var dularfull þegar hún var spurð út í hvaða verk yrði sett upp í vetur, og gat því miður ekki ljóstrað því upp hvaða sýning hefði orðið fyrir valinu.

„Þetta verður ein stærsta sýning sem við höfum sett upp, enda afmælissýning því þetta verður 170. sýningin sem Herranótt setur upp,“ segir Rakel. „Stefán Hallur Stefánsson, leikari og leikstjóri, mun leikstýra verkinu sem verður sýnt í Gamla bíói og við stefnum að því að frumsýna þann 27. febrúar,“ segir Rakel. „Verkið verður bæði fyndið og dramatískt, tónlistin mjög góð og skemmtileg. Þetta verður magnað!“

Menntaskólinn við Hamrahlíð

„Við í Leikfélagi Menntaskólans við Hamrahlíð munum setja upp sýningu næsta vor. Leikstjórinn okkar í ár er enginn annar en Dóri DNA. Núna á haustönn verður sett upp sýning eftir Helga Grím Hermannsson, nemanda í skólanum, en hann bar sigur úr býtum í handritakeppni sem haldin var í skólanum. Það er svakaleg leynd sem hvílir yfir því hvaða sýning verður síðan sett upp í vor en hún verður eflaust tilnefnd til Grímunnar sem snilld ársins,“ segir leikfélagsstjórn Menntaskólans við Hamrahlíð.

Verzlunarskólinn

Nemendafélag Versló setur upp söngleikinn Saturday Night Fever, byggðan á samnefndri kvikmynd með John Travolta í aðalhlutverki. Leikstjóri er Þorvaldur Davíð Kristjánsson.

Listafélag Verslunarskólans setur svo upp nýja útgáfu af Shakespeare-leikritinu Rómeó og Júlíu, en í þessari útgáfu verða elskhugarnir tvær stúlkur, þær Rómeyja og Júlía. Með aðalhlutverk fara þær Agnes Gísladóttir og Rannveig Eva Snorradóttir. Frumsýnt verður þann 7. nóvember.