Fyrrverandi fjármálaráðherra styður breytingar á VSK kerfinu

Fyrrverandi fjármálaráðherra telur skynsamlegt að minnka bilið milli lægra þreps virðisaukaskatts og efra þrepsins. Það þýddi hækkun á verði matvæla en á móti þyrfti að grípa til víðtækra mótvægisaðgerða.

Vigdís Hauksdóttir formaður fjárlaganefndar og Karl Garðarsson þingmaður Framsóknarflokksins hafa bæði lýst andstöðu við hækkun á virðisaukaskatti á matvæli sem nú er 7 prósent, eins og gert er ráð fyrir í drögum að fjárlagafrumvarpi.

En fjármálaráðherra vill hækka neðra þrepið og lækka efra þrepið sem nú er 25,5 prósent og fækka mjög undanþágum frá skattinum. Oddný G. Harðardóttir þingmaður Samfylkingarinnar og fyrrverandi fjármálaráðherra líst þokkalega vel á hugmyndir fjármálaráðherra.

„Það er mikilvægt að fækka undanþágum og bilið milli 7 prósenta og 25,5 prósenta er of mikið og veldur ýmsum vandræðum, bæði fyrir ríkið og fyrirtækin,“ segir Oddný.

Tæknilega sé hún því sammála markmiðum Bjarna Benediktssonar en aðgerð sem þessari fylgdi að verð á matvælum, bókum og fleiri nauðsynjavörum hækkaði.

„Það verða að vera sterkar mótvægisaðgerðir til að taka á þeim málum. Mér finnst líka mikilvægt að skoða samsetningu matarverðs í heildina tekið. Líka ofurtolla á landbúnaðarvörum,“ segir Oddný.

Grípa þyrfti til mótvægisaðgerða t.d. með hækkun barnabóta og persónuafslætti.

„En þær verða að vera traustar. Ég skil mjög vel tortryggni manna gagnvart því að nú eigi að hækka matarverð. Því þeir sem hafa minnst á milli handanna þola ekki að matarverð verði hærra hlutfall af útgjöldum,“ segir fjármálaráðherrann fyrrverandi.

Vigdís Hauksdóttir sagði í fréttum okkar í gær að aðgerðir sem þessar flæktu málin af óþörfu og hækkun matarverðs myndi sömuleiðis hækka vísitölu neysluverðs og þar með húsnæðislán fólks. Oddný bendir á að t.d. í Danmörku sé eitt skattþrep en barnafólki bætt það upp með góðum barnabótum.

En nú þurfa barnlausir og einstæðingar einnig að borða. Þeir sætu þá óbættir hjá garði?

„Þess vegna duga barnabæturnar ekki einar og sér. Það þarf líka að koma í gegnum persónuafslátt tildæmis,“ segir Oddný. En þessi aðgerð myndi hafa áhrif á vísitölu verðlags og þar með húsnæðislán fólks.

„Þetta er stór aðgerð og það þarf að fara yfir alla þessa hluti. Hvaða áhrif þetta myndi hafa á okkar samfélag, hag og kjör fólksins í landinu,“ segir Oddný G. Harðardóttir.