Hef aldrei á ævinni verið svona veikur

„Þessi vika er búin að vera sykursæt fyrir mig,“ segir Jón Arnór Stefánsson, landsliðsmaður í körfubolta, um síðustu daga í Málaga á Spáni þar sem lið hans CAI Zaragoza keppir í spænska Konungsbikarnum.

Zaragoza-liðið gerði sér lítið fyrir og vann flottan sigur á heimamönnum í Málaga fyrir framan um 15.000 áhorfendur og mætir stórliði Real Madrid í undanúrslitum í dag. Jón Arnór var fárveikur í aðdraganda leiksins en spilaði samt í níu mínútur og skoraði þrjú stig.

Algjörlega örmagna

„Ég hef aldrei á ævinni verið svona veikur. Ég fékk svakalega slæman magavírus á þriðjudaginn og lá inni á spítala með næringu í æð allan miðvikudaginn. Ég hélt engu niðri og gat hvorki borðað né drukkið,“ segir Jón Arnór en allt var gert svo þessi öflugi leikmaður gæti beitt sér að einhverju leyti í leiknum.

„Mér var tjaslað saman og ég settur á pillukúr til að stoppa þetta. Þetta er búið að vera rosalega erfitt en það var auðvitað svakalega gaman að vinna leikinn, sérstaklega eftir að vera undir svona lengi og auðvitað fyrir framan þeirra áhorfendur. Stemningin var alveg geðveik.“

Jón Arnór spilaði í níu mínútur í leiknum og það var meira en nóg. „Ég man voðalega lítið eftir seinni hálfleiknum, ég var svo örmagna. Við vorum mest 13 stigum undir en eftir að ég kom inn á fórum við að sigla fram úr. Við spiluðum alveg hörkuvörn. Við vorum komnir 6-7 stigum yfir þegar ég var tekinn út af og guð, hvað ég var feginn. Ég skreið nánast út af ég var svo örmagna. En strákarnir spiluðu frábærlega og kláruðu þetta,“ segir hann.

Árshátíð körfuboltans

Spænski Konungsbikarinn fer fram þegar deildakeppnin er hálfnuð en þá mæta átta efstu lið ACB-deildarinnar, þeirrar efstu á Spáni sem er sú sterkasta í Evrópu, á einn stað, að þessu sinni til Málaga, og afgreiða bikarinn á langri helgri. Mikil stemning myndast í kringum keppnina sem er ein sú stærsta og virtasta í Evrópu.

„Það er ekki bara út af körfuboltanum sjálfum heldur líka því að þetta er hálfgerð árshátíð körfuboltans hérna. Hérna hittast allir umboðsmennirnir og aðrir viðskiptamenn og klára mikið af samningum og ræða körfubolta. Það er gaman að sjá öll þessi stóru andlit í hótelanddyrinu en öll liðin eru saman á hóteli. Svo er bara brjáluð stemning í bænum, auglýsingaskilti úti um allt og troðfull höll á öllum leikjum,“ segir Jón Arnór.

Ætlum að njóta leiksins

Við ramman reip verður að draga í undanúrslitaleiknum þar sem Zaragoza-menn mæta stórliði Real Madrid. Jón Arnór er mátulega bjartsýnn fyrir leikinn.

„Það hefði verið skemmtilegra að mæta öðru liði og eiga séns á að komast í úrslitaleikinn. Við ætlum bara að njóta leiksins og njóta þess að spila við þá bestu. Real Madrid er með besta liðið í Evrópu í dag þannig að þetta verður rosalega erfitt. En við ætlum bara að sýna hvað við getum og halda höfðinu eins hátt og við getum,“ segir Jón Arnór Stefánsson.