Reykjavík varanleg staðsetning Landsmóts hestamanna

Nú líður senn að því að ákvörðun verði tekin um hvar halda skuli næstu tvö Landsmót hestamanna árin 2016 og 2018.

Niðurstaðan er í raun einföld. Víðidalurinn í Reykjavík hefur yfirburði til að halda Landsmót. Mikil uppbygging hefur verið á Fákssvæðinu í Víðidal á undanförnum árum og þar eru mjög góðar aðstæður, þær bestu sem fyrirfinnast á Íslandi, bæði fyrir hesta og menn. Hvergi á Íslandi er hægt að finna betri aðstæður fyrir mótsgesti en svæðið tekur alls um 16.000 manns og ganga gestir Landsmóts inn í alla þá þjónustu, fjölbreyttu gistingu og afþreyingu sem höfuðborgin hefur upp á að bjóða.

Út frá dýraverndunarsjónarmiðum eru bestu hugsanlegu aðstæður fyrir hesta á stórmóti í Víðidal. Húsarými er fyrir 3.000 hross sem og allan búnað þeirra. Hestarnir eiga þá sitt húsaskjól á staðnum og það minnkar mikið álag á hestunum, bæði líkamlega og andlega og þurfa þá ekki að vera í flutningum í hestakerrum til og frá mótsstað eins og þegar mótin eru haldin á landsbyggðinni. Þetta er stór og mikilvægur þáttur sem verður að taka með í reikninginn. Auk þess er dýraspítali á svæðinu og góð baðaðstaða fyrir hrossin í Víðidal. Kostnaður keppenda og eigenda hrossa á Landsmótum er mjög mikill sem verður að taka tillit til og draga úr eins og kostur er. Áhyggjuefni er að svo mikill er kostnaður sumra keppenda að þeir eru farnir að hugsa sig tvisvar um að halda á Landsmót.

Mikil reynsla

Fákur er elsta hestamannafélag landsins og með flesta félagsmenn. Mikil reynsla og þekking er innan Fáks í að halda stórmót en félagið heldur árlega stærstu mót ársins s.s. Reykjavíkurmeistaramótið og Gæðingamót Fáks ásamt því að hafa haldið tvisvar Landsmót með góðum árangri. Reykjavíkurborg er öflugasta sveitarfélag landsins og hefur burði og getu til styðja við stórviðburði sem Landsmót er. Af hverju ætti höfuðborgin þá ekki að vera varanlega staðsetningin fyrir Landsmót?

Á svæði Fáks í Víðidal er auðvelt að halda áfram uppbyggingu og viðhalda framúrskarandi keppnissvæði fyrir stórmót í framtíðinni. Við hljótum að vilja það besta fyrir Landsmót, þannig að það megi vera sem glæsilegast og árangursríkast fyrir hestamennskuna í heild. Landsmót skiptir greinina það miklu máli að það á ekki að vera með tilraunastarfsemi heldur að byggja á traustum grunni og fagmennsku. Hagkvæmast og farsælast væri að höfuðborgin yrði þjóðarvettvangur íslenska hestsins.