Fór aftur til fortíðar og lifði á 750 krónum á dag

Nanna Rögnvaldardóttir, matmóðir og rithöfundur, rakst á síðu í Mogganum frá miðjum kreppuárum þar sem Helga Sigurðardóttir húsmæðrakennari setur upp vikumatseðil fyrir fjölskyldu.

Nanna ákvað að gera tilraun vegna umræðunnar um matarkostnað og neysluviðmið ríkisstjórnarinnar upp á 248 krónur á máltið og fylgja þessum matseðli. Hún fór sínar leiðir í uppskriftum og spann upp í tengslum við tíðarandann.

„Mín niðurstaða er sú að ég held ég fari að horfa meira til fortíðarinnar í eldamennsku og rifja upp ýmislegt. Þegar fjölskyldan kom í mat þá blossaði upp nostalgía. Það sama gerðist hjá mörgum sem lesa bloggið mitt, þar sem ég birti uppskriftirnar og myndir. Mataræði okkar Íslendinga hefur nefnilega breyst alveg gífurlega á tiltölulega stuttum tíma,“ segir Nanna og þverneitar því að eldamennskan sé flókin en það kom henni á óvart hvað maturinn var í raun ódýr.

„Það var alltaf tvírétta og ég gat notað afgang af kvöldmatnum í hádeginu daginn eftir og jafnvel notað forréttinn eða eftirréttinn í morgunmat. Ég get lifað góðu lífi á 750 krónum á dag samkvæmt þessum matseðli, það er niðurstaðan.“

Hráefnin á matseðlinum voru ódýr en Nanna segir það alls ekki koma niður á næringunni. Þvert á móti.

„Það eru engar unnar matvörur á þessum matseðli heldur kjöt, innmatur, ferskur fiskur og grænmeti. Einnig eru ódýr hráefni í for- og eftirréttunum,“ segir Nanna og bætir við að gott sé að hafa í huga að nýta hráefnin í fleiri en eina máltíð enda felist mikill sparnaður í því, sérstaklega þegar eldað er fyrir fáa. 

Næsta tilraun Nönnu verður að skoða kreppumatseðla sem gerðir voru samkvæmt framfærsluviðmiði bæjaryfirvalda á fjórða áratug síðustu aldar. Þá hélt Húsmæðrafélagið samkeppni og húsmæður settu saman matseðla sem áttu að standast þessi viðmið, sem voru áttatíu aurar á dag á mann.

En ætlar hún ekki að skella í slíkan kreppumatseðil fyrir okkur nútímafólkið? „Það er aldrei að vita,“ svarar Nanna sposk.

80 ára gamall matseðill Helgu Sigurðardóttur