Höfuðáhersla lögð á félagslega húsnæðiskerfið

Félagsmálaráðherra reiknar með að leggja fram frumvarp um nýtt húsnæðiskerfi í lok apríl. Hún leggi mikla áherslu á félagslega hluta húsnæðiskerfisins en forseti ASÍ vill að í þeim efnum verði gengið lengra en ný skýrsla til ráðherra leggur til.

KPMG og Analytca skiluðu verkefnisstjórn á vegum  félagsmálaráðherra skýrslu í dag þar sem mælt með með dönsku leiðinni svo kölluðu í húsnæðismálum, sem ASÍ vakti fyrst athygli á í fyrra haust. Stofnuð verði húsnæðislánafélög á vegum banka og fjármálastofnana sem eingöngu láni til húsnæðiskaupa og Íbúðalánasjóði verði skipt í tvennt. Annars vegar í stofnun sem sjái um innheimtu þegar veittra lána og hins vegar stjórnsýsluhluta sem sjái um að framfylgja stefnu stjórnvalda í félagslegum húsnæðismálum.

Gylfi Arnbjörnsson forseti Alþýðusambandsins sagði í hádegisfréttum Bylgjunnar ekkert að því að eitt þessara húsnæðislánafélaga yrði Íbúðalánasjóður og að rétt væri að ganga lengra með dönsku leiðina varðandi félagslegt húsnæði. Þá yrðu vextir félagslegra húsnæðisfélaga greiddir niður um t.d 35 prósent í stað þess að greiða fjórðung af byggingarkostnaði.

„Það er það sem Danir hafa gert. Svo þegar búið er að borga lánið halda íbúarnir áfram að borga leigu en þá er sú leiga til ráðstöfunar til að standa að frekari byggingu. Þannig að Danir hafa í rúmlega mannsaldur byggt upp mikinn félagsauð þannig að kerfið stendur undir sjálfu sér,“ segir  Gylfi.

Eygló Harðardóttir félagsmálaráðherra segir þessar hugmyndir allar sem og fleiri sem borist hafi verkefnisstjórninni allar þess virði að skoða þær.

„Ég hef lagt áherslu á mikilvægi félagslega hlutans í húsnæðiskerfinu. Að við viljum byggja húsnæðiskerfi sem er fyrir öll heimili en ekki bara sum og við tryggjum öllum heimilum val og öryggi,“ segir félagsmálaráðherra.

Það væru hennar áherslur gagnvart verkefnisstjórninni. Hún voni að að frumvarp komi fyrir Alþingi fyrir lok aprílmánaðar.

„En ég hef lagt mjög mikla áherslu á að reyna að ná sem mestri sátt um húsnæðiskerfið. Þess vegna þarf að fara fram mjög víðtækt samráð og verkefnisstjórnin er að vinna að því. Þegar næst sátt um hlutina geta þeir oft unnist mjög hratt hér í gegnum þingið,“ segir Eygló Harðardóttir félagsmálaráðherra.