Fólk kemur frekar með föt í viðgerð eftir hrun

Fyrir tíu árum rak Stefanía M. Aradóttir verslun og flutti hún allar vörur inn. Eftir hrun breyttist landslagið og hefur hún nóg að gera við að taka við flíkum í viðgerðir á Saumastofu Íslands og sauma ullarflíkur fyrir túristabúðir. 

„Fólk lét ekkert gera við flíkur fyrir hrun enda var hlutfallslega ódýrara að kaupa sér nýja flík þá en núna,“ segir Stefanía. „Fólk henti bara fötunum ef þau rifnuðu eða það vantaði rennilás. Í dag margborgar sig að láta gera við flíkina.“

Mjög margir leita til saumastofunnar með vörur sem þeir hefur pantað sér í gegnum erlendu sölusíðuna Aliexpress. „Þá þarf að stytta kjóla, breyta hlýrum eða þrengja og víkka. Við finnum sérstaklega fyrir þessu fyrir jólin, ætli fólk sé ekki að koma með jólafötin sem það hefur pantað sér.“

Síðustu ár hefur einnig orðið mikil aukning á sölu ullarvarnings til ferðamannaverslana. „Nýframleiðslan hefur aukist mikið með auknum túrisma á landinu. Við saumum til dæmis húfur, grifflur og hettukjóla úr ull sem eru mjög vinsælir hjá ferðamönnum.“

Nýtni landans er greinilega orðin mun meiri eftir hrun því fyrir utan fataviðgerðir er nóg að gera við viðgerðir á alls kyns tjöldum. „Það eru margir sem koma með tjöldin sín, fortjöld á fellihýsum og annað slíkt til að láta gera við. Enda eru þetta rándýrar vörur og því töluverð útgjöld að endurnýja ef óhapp gerist.

Þessa dagana er vertíð á saumastofunni vegna dimissjón-búninga framhaldsskólanema. Stefanía segir þó margar pantanir vera í bið vegna kennaraverkfallsins.

„Já, það er smá bið núna því við vitum ekki hvernig verkfallið fer. Fyrstu hóparnir eiga að dimittera 11. apríl og þeir búningar eru tilbúnir. Vonandi leysist fljótt úr verkfallinu svo krakkarnir fá tækifæri til að nota búningana. Við erum bara í startholunum með að byrja á næstu búningum um leið og staðfesting fæst frá krökkunum um að þau ætli að dimittera.“