Hugleikur gefur óvænt út nýja bók

„Bókin segir frá heimsendi sem er þannig að allir í heiminum detta upp. Þyngdarafl jarðarinnar snýst við, alveg óútskýrt tek ég fram vegna þess að ég gat ekki fundið neina haldbæra vísindalega útskýringu á þessu, mér fannst það bara svo flott,“ segir Hugleikur Dagsson, sem gefur út í dag bókina Endir 3: Ofan og neðan. „Það var smá tæknilegt vesen þannig að þetta frestaðist,“ segir Hugleikur um óvænta útgáfu bókarinnar.

„Allir detta upp á sömu stundu, allir sem eru utandyra þjóta upp í himininn á fallhraða. Þeir sem lifa af eru allir sem eru innandyra, þannig það eru innipúkar heimsins sem erfa jörðina. En þeir erfa hana þannig að þeir þurfa að húka á loftum heimila sinna það sem eftir er,“ segir Hugleikur.

Í bókinni eru sögur tveggja eftirlifenda þessa merkilega heimsenda sem teiknaðar eru af Sigmundi Breiðfirði Þorgeirssyni og Lilju Hlín Pétursdóttur. „Sögurnar tvær eru sagðar sitthvorum megin á bókinni. Maður ræður hvora söguna maður les fyrst frá sitthvorum endanum og síðan mætast þessar sögur.“ 

Bókin er fáanleg á Dagsson.com en í tilefni af útgáfu bókarinnar er ekkert sendingargjald innanlands.