Samið um verð fyrir aðgang að innri markaði ESB

Næsti fundur vinnuhópa vegna endursamnings um fjárframlög EES-ríkjanna til Þróunarsjóðs EFTA (Evrópska fríverslunarbandalagsins) er ráðgerður um eða upp úr miðjum þessum mánuði.

Viðræður um greiðslur Íslands, Noregs og Liechtenstein fyrir áframhaldandi aðgang að innri markaði Evrópu á næsta tímabili, 1. maí 2014 til 30. apríl 2019, hófust 22. janúar síðastliðinn.

Á tímabilinu sem nú er að ljúka hafa greiðslur Íslands samsvarað um 1,5 milljörðum króna á ári hverju, eða 7,8 milljörðum alls.

Hlutur Íslands í heildargreiðslum hefur numið fimm prósentum og Liechtenstein einu prósenti, meðan Noregur hefur staðið undir 94 prósentum heildargreiðslna. Kostnaður EES/EFTA-ríkjanna fyrir tímabilið sem nú er að ljúka nemur alls 998,5 milljónum evra, eða sem svarar 155,5 milljörðum króna.

„Þessar viðræður eru hafnar en þær eru á algjöru frumstigi og engu hægt að svara á þessari stundu um tímasetningar eða fjárhæðir,“ segir Urður Gunnarsdóttir, fjölmiðlafulltrúi utanríkisráðuneytisins.

Lars-Erik Hauge, fjölmiðlafulltrúi sendinefndar Noregs hjá Evrópusambandinu, segir að frá því að samningsaðilar kynntu upphaflegar kröfur á fyrsta fundi í janúar hafi vinnuhópar hist tvisvar. Stefnt sé að því að þeir fundi aftur um miðjan mars. Eiginlegur samningafundur hafi ekki verið fastsettur.

Áherslan er á EES

Í janúarlok átti Gunnar Bragi Sveinsson utanríkisráðherra fund með Ingvild Næss Stub, aðstoðarevrópumálaráðherra Noregs, þar sem EES-samningurinn og framtíð hans var til umræðu.

Utanríkisráðherra gerði þá grein fyrir breyttum áherslum nýrrar ríkisstjórnar í Evrópumálum og lagði áherslu á mikilvægi EES-samningsins, sem væri grunnurinn að samstarfi Íslands við ESB.