Meiri velta í vændisstarfsemi á Íslandi en í Svíþjóð

Velta ólöglegrar starfsemi á borð við vændi, fíkniefni, smygl og heimabrugg er talin nema að meðaltali 6,6 milljörðum króna á ári hverju, samkvæmt tölum sem kynna á í Seðlabanka Íslands í dag.

Hagstofa Íslands mun í september undirgangast nýja staðla Evrópska efnahagssvæðisins fyrir þjóðhagsreikninga. Staðlarnir gera meðal annars kröfu um að velta ólöglegrar starfsemi sé tekin með í reikninginn. Hagstofa Íslands mun til að byrja með miða við samantekt úr meistararitgerð Sigurlilju Albertsdóttur hagfræðings frá árinu 2012.

Í rannsókn Sigurlilju kemur fram að Ísland sé á pari við Tékkland í veltu fíkniefna með rúm 0,2 prósent af vergri landsframleiðslu (VLF). Það er töluvert hærra hlutfall en hjá Danmörku og Svíþjóð þar sem fíkniefni ná ekki 0,1 prósenti af VLF.

Hlutfall vændis af VLF er langhæst í Tékklandi eða tæp 0,24 prósent. Íslendingar sitja fyrir ofan Svíþjóð með 0,06 prósent af VLF í vændisstarfsemi á meðan hlutfallið í Svíþjóð er 0,02 prósent. Tölurnar miða við tímabil þar sem sala á vændi var ólögleg.

„Það er huglægt mat hvort fólki þykir þetta lágt hlutfall eða hátt. Niðurstöður geta aldrei orðið betri en forsendur þeirra gagna sem til staðar eru. Þetta er sá hluti hagkerfisins sem vill ekkert láta mæla sig,“ segir Sigurlilja.

Hún segir tölurnar annars vegar fengnar með því að skoða framboð, úr upplýsingum lögreglu, og hins vegar eftirspurn. Þá eru meðal annars skoðaðar fyrirliggjandi upplýsingar frá SÁÁ. „Þær mælingar sem við erum með sýna að þetta er mjög lítið hlutfall af landsframleiðslunni. Þetta gæti verið mun meira,“ segir Sigurlilja.

Meistararitgerð Sigurlilju má nálgast hér.