Fyrrverandi fær 150 milljónir

Glee-stjarnan Jane Lynch er löglega skilin við Löru Embry frá og með deginum í dag.

Samkvæmt dómsskjölum sem fréttasíðan E! News hefur undir höndum samþykkti Jane að greiða Löru 1,2 milljónir dollara á tveimur árum, eða tæplega 150 milljónir króna. Þá fær Lara einnig peningagreiðslur þegar einhverjir af þáttunum sem Jane hefur leikið í eru endursýndir, til dæmis Glee og Two and a Half Men.

Jane og Lara hafa jafnframt ákveðið að selja félagsaðild sína í Mullholland-tennisklúbbnum og deila ágóðanum. Lara fær hins vegar að eiga félagsaðildina í snekkjuklúbbi Los Angeles og hund parsins, Francis.

Jane fær að eiga heimili parsins og tvær bifreiðar: Ford Escape Hybrid árgerð 2008 og Audi árgerð 2013.