Umboðsmaður Ricky Gervais til Íslands

Duncan Hayes, umboðsmaður grínistans Rickys Gervais, er á meðal þeirra sem heimsækja Ísland í tilefni af uppistandshátíðinni Reykjavík Comedy Festival sem verður haldin í fyrsta sinn 24. til 26. október.

Hayes er einnig umboðsmaður Stephens Merchant, samstarfsmanns Gervais, sem stígur á svið á hátíðinni á lokakvöldinu. Fjórtán erlendir uppistandarar koma fram á Reykjavík Comedy Festival og verða umboðsmenn þeirra flestra með í för.

Aðspurður hvort umboðsmennirnir, þar á meðal Hayes, ætli að fylgjast náið með íslensku uppistöndurunum sem koma fram á hátíðinni segist skipuleggjandinn Ísleifur B. Þórhallsson búast við því.

„Þeir eru að fara að tékka á þeim líka. Tilgangurinn með þessari hátíð er meðal annars að hún verði stökkpallur fyrir Íslendinga til útlanda og öfugt. Við viljum líka fá hingað grínista frá þessum löndum í Skandinavíu sem eru að halda þessa hátíð með okkur,“ segir Ísleifur.