Vilja KFC í miðborgina

Um sjötíu manns hafa skráð sig í grúppu á samskiptavefnum Facebook þess efnis að KFC opni útibú í miðbæ Reykjavíkur.

Á síðustu mánuðum og árum hefur það verið vinsælt að stofna hópa á Facebook til að ná fram markmiðum sínum. Til að mynda mótmæltu nemar í Háskóla Íslands því á Facebook fyrir jól að bátur mánaðarins á Subway væri með túnfiski - Subway brást við með því að breyta bátnum í BMT vegna þrýstings frá fólkinu.

Það var sjónvarpsstjarnan Margrét Erla Maack í Kastljósinu sem stofnaði hópinn síðdegis í gær og hafa fjölmargir aðdáendur staðarins skráð sig síðan þá.

Til dæmis hefur Heiða Kristín Helgadóttir, frambjóðandi Bjartrar framtíðar og fyrrum aðstoðarmaður borgarstjóra, skráð sig í hópinn og sagði á síðunni í gær að hún sé „að ræða við formann skipulagsráðs um þetta í þessu töluðu. ég vænti þess að þetta verði komið fyrir næstu helgi. ég finn hvernig zwingerilmurinn magnast!," segir hún.

Annar meðlimur í hópnum segir: „Það er náttúrulega bara hreint og klárt mannréttindabrot að það sé ekki hægt að fá steiktan kjúkling vestan við Suðurver."

Það skal tekið fram að hópurinn er eflaust stofnaður í kómískum tilgangi, en oft er sagt að öllu gríni fylgir einhver alvara.

Áhugasamir geta skráð sig til leiks hér.