Nýtt verðþak tekur gildi 1. júlí

Um næstu mánaðamót lækkar verð á notkun farsíma og netlykla milli landa innan Evrópu samkvæmt reglugerð ESB.

„Íslenskir neytendur njóta góðs af reglugerðinni þar sem hún tekur einnig gildi hér í gegn um EES samninginn,“ segir í umfjöllun Póst- of fjarskiptastofnunar (PFS).

„Þannig gildir reglugerðin á evrópska efnahagssvæðinu öllu, það er innan ESB og á Íslandi, í Noregi og Lichtenstein.“ Reglugerðin gildir hins vegar ekki utan þessara landa.

Samkvæmt reglunum er fjarskiptafyrirtækjum skylt að láta viðskiptavini sína á ferð í Evrópulöndum vita, þegar þeir hafa notað 80 prósent af mánaðarlegum hámarkskostnaði fyrir gagnanotkun, sem er 50 evrur.

„Fyrirtækið skal loka á gagnanotkun í símann/netlykilinn þegar hámarkinu er náð, nema viðskiptavinurinn biðji sérstaklega um annað.“

Þá á fólk að fá sjálfvirk skilaboð um að það sé að nota reikiþjónustu og fá grunnupplýsingar um kostnað þegar það tengist fjarskiptafyrirtæki í öðru landi en sínu eigin innan evrópska efnahagssvæðisins.