Skyndifriðun til fimm ára

Mörður Árnason fer mikinn í svari við grein undirritaðs (sem hann segir raunar vera Níelsson) þar sem fjallað var um lítið innihald í miklum samráðsferlum við samningu nýrra laga um náttúruvernd. Hann segir Alþingi hafa ýmist fallist á eða komið verulega til móts við fimm af sjö atriðum sem Samorka hafi gert athugasemdir við í sinni umsögn. Grein undirritaðs fjallaði raunar aðallega um samráðsferlið langa á vegum umhverfis- og auðlindaráðuneytis, þar sem lítið tillit var tekið til athugasemda, en gott og vel.

Til að nefna hér eitt af téðum fimm atriðum þá var ákvæðum frumvarpsins um nýja heimild umhverfisráðherra til skyndifriðunar í allt að fimm ár breytt á þann veg, að bannið gildir einungis í þrjá mánuði til að byrja með en þarfnast síðan ítrekunar ráðherrans (og gildir þá í allt að fimm ár). Þetta flokkast tæplega sem mikil breyting og Samorka mun áfram mótmæla því að ráðherra geti á þennan hátt upp á sitt einsdæmi bannað tilteknar framkvæmdir í allt að fimm ár, án þess að auglýsing um friðun eða friðlýsingu hafi verið birt.

Hér verður annars ekki fjallað efnislega um umsögn Samorku um þingmálið, sem Mörður reifar á býsna stílfærðan hátt í sinni grein, en allir geta nálgast umsögnina á vef á Alþingis.