Til varnar hrægömmum

Undanfarin ár hefur meira og minna allt samfélagið snúist um fyrrverandi, núverandi og verðandi fjármálagerninga. Ég verð nú að viðurkenna að skilningur minn á þessum fjármálafléttum hefur verið afar takmarkaður og nú hefur reyndar komið í ljós að skilningurinn var víst engu meiri innan fjármálageirans. Hugtök eins og yfirveðsettir afleiðuvafningar eru mér framandi en þegar menn eru farnir að blanda óskildum og saklausum lífverum inn í umræðuna, þá er nauðsynlegt að staldra aðeins við.

Hrægammasjóðir hafa oft komið upp í umræðunni og nær undantekningalaust á neikvæðan hátt. Þetta er í raun bein þýðing á orðinu vulture funds og vísar líklega til þess að slíkir sjóðir vinna einkum með „líflausar“ eignir sem aðrir fjárfestar líta ekki við.

Raunverulegir hrægammar eru hins vegar allt annað en neikvæðir en þurfa nú enn og aftur að taka á sig illt umtal að ósekju. Dapurt almenningsálit á fuglunum hefur lengi viðgengist. Vissulega má segja að þeir hafi ekki útlitið með sér, eru sköllóttir og rytjulegir en það eru nú fleiri og ekki hafa hárlausir karlmenn þurft að þola svipaða fordóma. Misgóðar kúrekamyndir frá Hollywood hafa líka gert sitt til að sverta hrægammana, þar sem þeir svífa yfir særðum hetjum í von um bita þegar hinsta stundin rennur upp.

Sannleikurinn um hrægamma

Hrægammar eru í raun stórmerkileg dýr sem skiptast í 23 tegundir og þar af er um helmingur í alvarlegri útrýmingarhættu. Hrægammar gegna afar mikilvægri vistkerfisþjónustu. Þeir hreinsa upp hræ af mikilli nákvæmni og tryggja þannig mikilvægt flæði næringarefna. Umfram allt fyrirbyggja þeir sýkingarhættu af völdum baktería eins og miltisbrands.

Sýnt hefur verið fram á að á svæðum þar sem enga hrægamma er að finna eru hræ þrefalt lengur að rotna með tilheyrandi vandkvæðum. Hrægammar drepa ekki heldur vinna upp hræ og skila lífrænum efnum til baka í hringrás vistkerfisins með mikilli nýtni.

Ef hrægammasjóðir myndu vinna eins og raunverulegir hrægammar þá myndu þeir vinna fljótt og vel úr öllum eignum þrotabúa og skila nauðsynlegum verðmætum með skilvirkum hætti til baka út í samfélagið. Hrægammar reyna ekki að hámarka verðmæti á kostnað annarra heldur vinna sín hreinsunarstörf af elju og útsjónarsemi. Ef þú, lesandi góður, ert enn að lesa þennan pistil þá bið ég þig um láta ekki neikvæða umræðu sverta hina raunverulegu hrægamma sem eru merkilegar lífverur og eiga ekkert illt skilið.