Uppgjör hjá Alfreð og Degi

Íslendingaliðin Füchse Berlin og THW Kiel mætast á morgun í toppslag í þýsku úrvalsdeildinni í handbolta en liðin eru bæði með 26 stig í 2. og 3. sæti deildarinnar. Þjálfarar liðanna eru þeir Dagur Sigurðsson hjá Füchse og Alfreð Gíslason hjá Kiel. Leikurinn hefst klukkan 14.00 og verður í beinni útsendingu á Stöð 2 Sport 3 en það er búist við troðfullri höll og mikilli stemmningu.

„Við erum ekki oft litla liðið á heimavelli en það er þannig í þessum leik. Ég myndi vera sáttur við jafntefli,“ sagði Dagur í viðtali við BZ.

Refirnir hans Dags Sigurðssonar hafa unnið sjö leiki í röð í deild og Evrópukeppni og hafa ekki tapað síðan á móti HSV Hamburg 27. október síðastliðinn. Þeir koma því fullir sjálfstraust inn í leikinn. Kiel hefur aðeins tapað einu sinni í síðustu sex deildarleikjum sínum og það tap kom í toppbaráttuslag á móti Flensburg fyrir tveimur vikum.

Þetta verður í þrettánda sinn sem Alfreð og Dagur mætast sem þjálfarar þessara tveggja liða í deild, bikar eða Evrópukeppni. Tölfræðin úr þeim leikjum er ekki hagstæð fyrir Dag og lærisveina hans enda hefur hann aðeins einu sinni náð að fagna sigri á Alfreð. Sá sigur kom í deildarleik 19. september 2010 en Füchse Berlin vann þá 26-23. Füchse náði jafntefli á móti Kiel í heimaleiknum í fyrra en Alfreð hefur aftur á móti fagnað sigri í hinum tíu leikjunum. Þetta verður fyrsti leikurinn síðan Alfreð var valinn besti þjálfari heims annað árið í röð.

„Ég vona að vörnin verði traust og markverðirnir okkar eigi góðan dag. Það verður að ganga eftir ef við ætlum að vinna Kiel,“ sagði Dagur.