Öflugri löggæsla

Á næsta ári er gert ráð fyrir rúmlega 500 milljóna króna framlagi til eflingar löggæslu. Hér er um mikilvægan áfanga að ræða enda er það eitt af helstu verkefnum stjórnvalda að tryggja öryggi almennings og gæta þess að lögregla geti tekist á við sitt mikilvæga þjónustuhlutverk.

Strax í upphafi næsta árs munu landsmenn þannig verða varir við aukna löggæslu, meðal annars með fjölgun lögreglumanna. Á næstu dögum verður skipuð þverpólitísk þingnefnd sem fær það hlutverk að forgangsraða fyrrnefndu fjármagni. Henni til stuðnings verður sérstakt rekstrarteymi á vegum innanríkisráðuneytisins sem hefur nýtt sumarið vel til að greina störf lögreglunnar, fá skýra sýn á öryggis- og þjónustustig, mannaflaþörf og fleira þannig að hægt sé að meta þörfina, til dæmis eftir staðsetningu lögreglunnar í landinu.

Við getum öll verið sammála um mikilvægi þess að halda uppi skilvirkri og öflugri löggæslu í landinu. Það er sérstaklega brýnt að efla löggæsluna með fjölgun lögreglumanna, en einnig þurfum við að flýta rannsókn mála, huga vel að útbúnaði lögreglunnar og tryggja öryggi lögreglumanna.

Fyrir utan það að veita fjármagn til að efla löggæslu er í nýju fjárlagafrumvarpi einnig gert ráð fyrir framlagi til þess að sporna við skipulagðri glæpastarfsemi, auknu framlagi til rannsóknar á kynferðisbrotum og þá sérstaklega gagnvart börnum þar sem bætt er við tæplega 100 milljónum króna.

Það hefur verið ánægjulegt að skynja öflugan stuðning þingmanna allra stjórnmálaflokka á Alþingi við þessari ákvörðun um að efla löggæslu í landinu. Ég vona að þannig verði það áfram og veit að með öflugri löggæslu munum við bæta enn frekar almannahag og öryggi í íslensku samfélagi.