Umbun

Hvað vekur áhuga á tilteknu starfi? Ýmislegt hefur áhrif þar á. Til dæmis innri hvatar eins og persónulegur metnaður og áhugasvið viðkomandi og svo ytri hvatar eins og laun og sú umbun sem starfið hefur í för með sér. Inn í þetta spila líka þættir eins og vinnuumhverfið í starfinu.

Í leikskólum virðist fækka sífellt í röðum þeirra sem hafa leikskólastarf að ævistarfi og einn af áhrifavöldunum er án efa launakjörin sem í boði eru. Annað sem hefur áhrif á þessa þróun er undirmönnun og álag í starfinu. Álag á vinnustaðnum eykst til muna þegar erfiðlega gengur að ráða inn og þegar álagið eykst verða fleiri fjarverandi vegna veikinda. Þar af leiðandi eykst álagið á þá sem standa vaktina enn þá meira. Ég trúi samt að þeir sem hafa valið leikskólakennslu sem ævistarf hafi gaman að því að vinna með börnum og séu flestir með brennandi áhuga á starfinu. Í svona aðstæðum getur álagið þó verið mikið og hættan til staðar að fólk brenni út í starfi.

Mörg störf eru í boði í leikskólum og þar á meðal nokkrar stöður deildarstjóra. Það gengur hægt að ráða í þessar stöður og ég er nokkuð viss um að hlutfall leikskólakennara í hópi umsækjenda sé lágt. Í umræðunni er einnig fækkun umsækjenda í nám í leikskólakennarafræðum á síðustu árum. Staðan er því að verða alvarleg.

Gríðarlega stoltur

Fyrir tíu árum síðan tók ég ákvörðun um að gerast leikskólakennari. Ég sé ekki eftir þeirri ákvörðun og er gríðarlega stoltur af mínu starfi. Ég sé ekki eftir því þó svo að ég þurfi að vinna tvær aukavinnur til að fjölskyldan nái endum saman. Ég sé ekki eftir því þó að álagið sé oft með ólíkindum og ég sé ekki eftir því þó að ég sé oft einn karl á meðal kvenna. Stundum hef ég hugsað um að skipta um starfsvettvang, fara til dæmis að vinna í banka þar sem launaumslagið er þykkara. Þar eru alls kyns bónusar í boði og ég gæti fengið hlut í bankanum að gjöf frá ríkinu með öllu tilheyrandi.

En metnaður minn liggur ekki þar. Mín umbun er í öðru formi. Ég fæ að kynnast fullt af flottum einstaklingum og hjálpa þeim að stíga sín fyrstu skref í skólakerfinu. Mér er umbunað með því að fá lítil faðmlög þegar ég mæti í vinnuna, ég tekst á við fjölbreytt verkefni á hverjum degi og ég er stoltur af starfinu í lok dags. Ég fæ líka að taka þátt í að móta framúrskarandi leikskólastarf. Það er gaman að vinna í leikskóla, það er líka krefjandi og oft erfitt. En um leið er starfið gefandi, starfsandinn góður og börnin eru frábær. Samskiptin við þau eru umbunin og það er út af þeim sem fólk heldur áfram að berjast þrátt fyrir erfiðar aðstæður. Það mætti samt alveg vera aðeins meiri umbun í formi launa og ég vænti þess að þeir sem hafa ákvörðunarvald um þennan málaflokk geri sér grein fyrir hvernig málin standa. Það er nefnilega alveg fínt að vera með góða hjólastíga í borginni okkar en ég held að flestir séu sammála um að það sé enn betra að vera með vel mannaða leikskóla.