Jafnrétti er sjálfsagt mál!

Það sem gleymist oftar en ekki í umræðunni er að Sjálfstæðisflokkurinn var leiðandi í jafnréttismálum á Íslandi. Sjálfstæðisflokkurinn var í ríkisstjórn 1976 þegar jafnréttislögin voru samþykkt. Fyrsta konan til að gegna borgarstjóraembætti var Auður Auðuns sjálfstæðiskona og fyrsta konan í ráðherrastóli var Ragnhildur Helgadóttir einnig sjálfstæðiskona. Eftir sveitarstjórnarkosningar 2006 voru fimm konur bæjar- eða sveitarstjórar fyrir Sjálfstæðisflokkinn.

Raunin er sú í dag að Sjálfstæðisflokkurinn er ekki tengdur við þennan málaflokk. Það er mesta furða þar sem Sjálfstæðisflokkurinn er sá flokkur sem staðið hefur vörð um mannréttindi. Það er kominn tími til að Sjálfstæðisflokkurinn komi þessari stefnu sinni betur á framfæri og verði aftur leiðandi afl og beiti sér sem aldrei fyrr fyrir jafnrétti. Jafnrétti verður ekki náð með lögum og reglugerðum einungis heldur þurfum við að útrýma félagslegu hömlunum sem eru allt í kringum okkur.

Ég var að vinna að verkefni í stjórnunaráfanga þar sem fjallað var um siðferðislegu spurningarnar sem starfsmenn geta lent í og ein spurningin var hvort starfsmaðurinn ætti að tala við forstjóra stórfyrirtækis sem hann vann hjá. Ég var í hópi með þremur stúlkum sem, án þess að blikka, ákvaðu að forstjórinn væri karlkyns.

Þegar ég var spurður álits þá gat ég bara sagt að það væri ótrúlegt að þær hefðu kynjað forstjórann sem aldrei var nefndur á nafn eða sett kyn á hann í verkefninu. Þetta er skýrt dæmi um hvernig staðalímyndir okkar eru líklegar til að hefta okkur. Ef þú getur ekki séð sjálfan þig fyrir þér í einhverju starfi þá er leiðin þangað löng.

Innan borgarinnar er 8,5% kynbundinn launamismunur og reyna menn að afsaka hann með því að benda á að konur biðja síður um launahækkanir. Ef þetta eru svörin þá er rót vandans væntanlega viðhorfið. Þessi ósýnilegi veggur sem hamlar körlum að fara í umönnunarstörf og konum að verða að leiðtogum. Við verðum að taka upp fræðslu í grunnskólum landsins til þess að reyna að eyða þessum höftum, þannig að allir eigi raunverulega jöfn tækifæri lagalega og félagslega.

Fimm ár í röð höfum við verið það land þar sem konur hafa það best. Ísland skorar 80 stig af 100, en eigum við að nema staðar þar? Það á ekki að vera neinn vafi á því að jafnrétti á að vera sjálfsagt!

Ég, Aron Ólafsson, stefni í 4.-5. sæti í prófkjöri Sjálfstæðisflokksins til borgarstjórnar. Eitt af stefnumálum mínum er að setja ríka áherslu á jafnréttismál.