Borg barnafjölskyldna

Fjölskyldur með ung börn hafa ekki farið varhluta af erfiðu efnahagsástandi síðastliðin ár.

Barnafjölskyldur eru með námslán á bakinu, eru að koma sér upp þaki yfir höfuðið og að hasla sér völl á vinnumarkaði. Þetta er fólkið sem á börn á leikskólaaldri með öllu því himneska vafstri sem smábörnum fylgir. Það er mikilvægt að standa vel við bakið á smábarnafjölskyldum og það hefur Reykjavík svo sannarlega gert síðastliðin ár. Ég vil sérstaklega beina sjónum að leikskólagjöldum, sem hjá allflestum fjölskyldum á landinu taka í budduna. Þar eru lægstu gjöldin greidd í Reykjavík.

Af þessu má sjá að Reykjavík hefur vinninginn, sérstaklega gagnvart fjölskyldum með tvö börn eða fleiri á leikskólaaldri. Munurinn er allt frá því að vera 31% og upp í 64%.

Gott að vera námsmaður

En skoðum þá hvernig dæmið lítur út hjá námsmönnum, öryrkjum og einstæðum foreldrum. Þess má geta að starfsfólk leikskóla fær einnig þennan sama afslátt af leikskólagjöldum og er Reykjavík eitt örfárra sveitarfélaga sem býður starfsfólki leikskóla þau hlunnindi.

Menntun og velferð

Munurinn er skýr. Í Reykjavík hefur verið forgangsraðað í þágu barnafjölskyldna þrátt fyrir erfiða stöðu borgarsjóðs og fyrirtækja í hennar ábyrgð. Við höfum hagrætt í stjórnkerfi og farið í skipulagsbreytingar með sameiningu sviða og í yfirstjórn stofnana. Við stöndum vörð um velferð og skólastarf, höfum fjölgað leikskólaplássum verulega og leggjum mikinn metnað í okkar kraftmikla skóla- og frístundastarf. Fagmennska og metnaður kennara og starfsfólks, sem og áhrif foreldra, skipta þar höfuðmáli. Árangurinn sýnir sig í betri árangri á flestum sviðum skólastarfs, betri líðan barna og unglinga, meiri ánægju foreldra og minna einelti.

Leikskólinn er menntastofnun

Leikskólinn er menntastofnun, ekki þjónustustofnun. Í umræðu um leikskólann er oft einblínt um of á þjónustuhlutverk hans en leikskóli er skóli fyrir börn á viðkvæmu og mikilvægu skeiði. Sú staðreynd að leikskólinn á Íslandi er almennur og í boði fyrir alla án aðgreiningar er gríðarmikilvæg. Með því stuðlum við að jöfnuði og tryggjum að öll börn geti dafnað í þroskavænlegu og skapandi umhverfi. Þetta mætti kalla félagslegt hlutverk leikskólans, sem er hans mikilvægasta hlutverk og mætti ræða mun oftar en þjónustuhlutverkið. Stærsta velferðarmálið er góð almenn menntun fyrir börn á leik- og grunnskólaaldri, uppbyggilegt frístundastarf fyrir börn og unglinga og hóflegt gjald fyrir leikskólanám og aðra þætti skóla- og frístundamála í Reykjavík. Þannig borg viljum við búa í, þannig borg er Reykjavík.