Ellefu milljóna sparnaður?

Það kannski sýnir metnað, eða metnaðarleysi ríkisstjórnarflokkanna, að við gerð fjárlaga fyrir árið 2011 þá voru settar 11,2 milljónir til þess að greina skuldavanda heimilanna, í fjárlögum ársins 2011. Núna er fjárlaganefnd búin að afgreiða frá sér lokafjárlög 2013.

Þar er lagt til að þessi heimild, fjárheimild, verði felld niður vegna þess að það hefur ekki verið þörf fyrir það að nýta hana.

Auðvitað þurfti Jóhönnustjórnin ekkert að greina skuldavanda heimilanna. Enda slær hjarta Jóhönnu með heimilunum í landinu. Móðurhjarta réttlætis þeirra sem minna mega sín.

Helsti vandi heimilanna var að þau fengu ekki nægar vaxta- og barnabætur. Svo þessar bætur voru hækkaðar. Auk þess sem 110% leiðin og fleira var í boði.

Jóhönnustjórnin gleymdi hins vegar að greina þann vanda, að ekki voru til peningar í ríkissjóði fyrir þessum bótahækkunum.

Var því gripið til þess ráðs að hækka skatta og þá helst þá skatta sem bein áhrif höfðu á verðlag.

Vandinn sem heimilin stóðu frammi fyrir á endanum var sá að skattahækkanir stjórnvalda og aukin gjaldtaka ríkis og sveitarfélaga ollu 70 milljarða hækkun á verðtryggðum lánum heimilanna. Á meðan skiluðu aðgerðir stjórnvalda aðeins tæplega 50 milljörðum til lækkunar á móti.

Það skyldi þá ekki vera vandinn að heimilin í landinu, sum hver í það minnsta, hafi valið sér vitlaust hjarta til þess að slá fyrir sig?