Kirkjustrætið verði að mestu göngugata

Kirkjustræti verður að mestu leyti göngugata sem verður með rafrænni umferðarstýringu, samkvæmt breytingu á deiliskipulagi Landsímareitsins svokallaða. Þá verður nýbygging sem reist verður við strætið látin ríma betur við gömlu húsin sem Alþingi hefur látið gera upp þar. Deiliskipulagstillagan var kynnt í Ráðhúsi Reykjavíkur í gær.

Að sögn Páls Gunnlaugssonar, arkitekts hjá ASK arkitektum, sem unnu samkeppni um skipulag reitsins í fyrra, verður rafræn umferðarstýring sem hægt verður til dæmis hægt að tímastýra. „Það verður í það minnsta hægt að loka Kirkjustræti fyrir umferð og gera götuna þannig að göngugötu aðallega. Þannig verður því haldið að byggja alveg út í gangstétt og þétta göturýmið þarna. Svo látum við húsið tala við gömlu húsin við götuna."

Í hönnunarsamkeppni borgarinnar í fyrra var Ingólfstorg hluti af skipulagssvæðinu. Páll segir að þegar ákveðið hafi verið að halda áfram með vinnuna eftir keppnina hafi verið ákveðið að takmarka svæðið og taka Ingólfstorg út. Því verður ekkert byggt þar í þessari uppbyggingu. Þetta er stærsta breytingin.

„Nasa er náttúrlega rifið, en það er sett sem kvöð í skipulagi að það verði byggður fjölnota salur í svipaðri mynd og Nasa-salurinn er í dag. Hliðarsvalir verða í gólfhæð að Vallarstrætinu, þannig að það verður hægt að opna út og það verða gluggar út á Vallarstrætið. Þannig verði hægt að nýta salinn betur og menn fá ekki blinda hlið að Vallarstræti."

Sem fyrr er gert ráð fyrir því að Landsímahúsið svokallaða verði hækkað lítillega. Þakinu verður lyft og settir verða kvistir og stórar svalir munu vísa að Kirkjustræti, Austurvelli og Víkurgarði, en garðinum er ætlað aukið vægi og mun fá hverfisvernd.

Ef deiliskipulagið fær framgang innan borgarkerfisins nú gætu framkvæmdir á svæðinu hafist í haust. Tillagan var kynnt í ráðhúsinu í gær og verður þar til sýnis næstu tvær vikurnar. Hún verður einnig til sýnis í húsnæði borgarinnar í Borgartúni og á heimasíðu hennar. Frestur til athugasemda er einnig til 6. mars.