Vill opna öll gögn um fjármál ríkisins

Starfshópur vinnur nú að því að birta fjárhagsupplýsingar ríkisins á netinu og er ætlunin að upplýsingar um tekjur og gjöld verði birtar mánaðarlega. Hópnum er ætlað að leggja til leiðir um það hvernig hægt er að opna sem mest af gögnum um það hvernig skattfé er varið.

Fjármálaráðuneytið og forsætisráðuneytið standa að starfshópnum en að auki kemur innanríkisráðuneytið að verkefninu. Katrín Júlíusdóttir fjármálaráðherra segir það sinn draum að hægt sé að opna sem mest af gögnum um fjárreiður ríkisins.

„Við fáum til dæmis fyrirspurnir reglulega um hvernig skúffufénu sé varið, af hverju eiga menn ekki bara að geta flett því upp? Við höfum ekkert að fela í því og okkur ber að taka þetta saman og sýna þetta," segir Katrín, en með skúffufé á hún við ráðstöfunarfé sem ráðherrar hafa til úthlutunar.

„Svo má nefna fyrirspurnir um niðurbrot á útgjöldum. Af hverju ekki bara að láta þetta vera opið og þeir sem hafa áhuga á að leita að því af hverjum ráðherra kaupir ráðgjafaþjónustu, eða eitthvað, þeir geti bara flett því upp. Þetta skapar líka ákveðið aðhald og ég held að þetta sé öllum hollt, bæði samfélaginu öllu og líka þeim sem starfa innan kerfisins."

Formaður starfshópsins er Finnur Pálmi Magnússon, sérfræðingur í upplýsingatækni, og segir Katrín mikilvægt að fá fólk úr grasrótinni til starfans.

Hópurinn hefur skamman tíma til starfa, en ætlunin er að gögnin verði öll tekin saman og birt á vefsíðunni Island.is.

„Við munum ekki byrja að birta kvittanir strax í næsta mánuði en við ætlum að taka fyrsta skrefið. Endamarkmiðið er að fara eins langt og við getum."