Stuðningsgrein: Ég vil sjá Guðbjart sem næsta formann

Kosning í formannskjöri Samfylkingarinnar er hafin og þar keppa tveir öflugir frambjóðendur að því að leiða Jafnaðarmannaflokk Íslands til framtíðar. Ég rita þessa grein til stuðnings Guðbjarti Hannessyni, flokksfélaga mínum og vini. Ég hef kynnst störfum Guðbjarts eða Gutta eins og hann er jafnan kallaður og það sem ég met mest í fari hans er heiðarleiki, hann er ávallt niðri á jörðinni og sýnir flokkssystkinum sínum virðingu og gefur sér alltaf tíma til að hlusta á mann og taka gagnrýni.

Þar á bæ er heldur enginn hroki, né mikilmennska eða verið að skara eld að sinni köku. Það er aðdáunarvert að fylgjast með Gutta sem þingmanni og ráðherra sem alltaf er tilbúinn að finna leiðir að lausnum. Auðvitað er það ekki nóg að vera persónulegur og heiðarlegur til að ná árangri í stjórnmálum. Hann er óþreytandi að vinna að málefnum flokksins og þjóðarinnar.

Guðbjartur Hannesson náði ótrúlegu kraftaverki sem formaður sáttanefndar í sjávarútvegi að leiða ólíka hagsmunaaðila að borðinu um málamiðlun um breytingar á fiskveiðistjórnunarkerfinu. Það er í mínum huga ótrúlegur hæfileiki sem fáir hefðu getað gert og nánast kraftaverk. Samningalipurð er eitt það helsta sem leiðtogar í stjórnmálum verða að hafa til að ná árangri. Þar er enginn betri en Guðbjartur og flokksfélagar Samfylkingarinnar geta treyst því að Guðbjartur Hannesson hyglir ekki sínum vinum og í huga hans er það flokkurinn og þjóðin sem eru í fyrsta sæti.

Guðbjartur Hannesson hefur sýnt það sem velferðarráðherra að velferðarkerfið hefur verið varið með kjafti og klóm í kreppunni og hlíft þeim sem minnst mega sín, má þar nefna hækkun lífeyrisgreiðslna ásamt því að verja heilbrigðisþjónustuna.

Það er sannur jafnaðarmaður og það er einmitt svoleiðis leiðtogi sem Samfylkingin þarf á að halda í næstu alþingiskosningum. Traustan leiðtoga sem ver velferðarkerfið og er þar að auki með mikla þekkingu og reynslu sem landsbyggðarþingmaður og það er kominn tími til að Samfylkingin fari að hlúa að landsbyggðinni og félögum Samfylkingarinnar þar og ég treysti best Guðbjarti til að hlúa að starfi og stefnu Samfylkingarinnar á næstu árum í sveit og borg, með áheyrslu á ný tækifæri í atvinnusköpun og með öflugu velferðarkerfi. Flokki á borð við Samfylkinguna með öll sín gefandi stefnumál og traustan leiðtoga á borð við Guðbjart Hannesson í brúnni eru allir vegir færir til að verða burðarflokkur á Alþingi og í næstu ríkisstjórn Íslands.