Ísland úr NATO

Fjöldamorðum fjölgar ár frá ári. Það eru ekki vopnin sem drepa heldur mennirnir er sagt. Óréttlætið og misskiptingin í heiminum er þvílík að milljónir svelta til dauða á meðan gífurlegum auðæfum er eytt í vopnaframleiðslu og drápstæki.

Félagar okkar í NATO eru mestu vopnasalar og -framleiðendur í heimi. Lítum á kjarnavopnin. Þau á ekki að nota er sagt, þau eru til að ógna þeim sem ekki hegða sér vel. Kjarnavopnin ógna okkur öllum og skapa ótta hjá fólki. Óttinn leiðir af sér ofbeldi, fjöldamorð, nauðganir, einelti og geðveiki. Í NATO tökum við þátt í innrásum og morðum á saklausu fólki sem á sér einskis ills von.

Íslendingar ættu ekki að taka þátt í þessum félagsskap. Ísland ætti að ganga úr NATO. Til fróðleiks vísa ég í stefnuskrá Húmanistaflokksins um þetta mál:

„Öllum kjarnavopnum verði eytt án tafar. Flokkurinn hafnar stríði sem lausn á deilumálum og krefst þess að árásarherir yfirgefi hernumin svæði. Ísland segi sig úr NATO og taki ekki þátt í hernaðarbandalögum."

Kjarnavopnin eru tifandi tímasprengja. Því er brýnt að Íslendingar liggi ekki á liði sínu heldur berjist af krafti á alþjóðavettvangi fyrir eyðingu kjarnavopna.