Ný(r) og betri!

Heimsendir skall á okkur á vetrarsólstöðum án tilheyrandi jarðskjálfta, ofsaflóða og þrumuveðurs. Eða hvað? Majarnir boðuðu ekki harmleik – þvert á móti markaði endalok dagatals þeirra nýtt vitundarstig. Upplýstrar tilveru og nýrrar þekkingar og sáttar. Nýs upphafs. Upphafs sem hefst með þér á þessum áramótum í gregorískum skilningi. Hvaða nýi veruleiki blasir við þér? Margir hafa haldið því fram að í raun breytumst við lítið. Lifum og hrærumst í sömu fjölskylduboðunum, í sömu flækjunum, með sömu hugsanir ævilangt. Vissir þú að líkaminn endurnýjar flestar frumur sínar á 7-10 ára fresti? Nýjar rannsóknir sýna að meira að segja hluti heilafrumna fjölga sér. Ný(r) þú – alveg án fyrirhafnar! Er ekki tími kominn til að taka stjórn á þinni umbreytingu og gera góða hluti enn betur?

Áramót eru klassískur tími endurskoðunar og nýrrar markmiðasetningar. Hvernig væri að taka nýja sýn á þitt líf í þessari viku og leita þinna svara við nokkrum öflugum spurningum?

Segðu nei og meintu það!Við erum ofsótt af áreitum í dagsins önn og reynum í okkar "dugnaði" að bregðast við þeim öllum. Svara tölvupóstum í tugatali fyrir hádegi, sækja fundina tuttugu og sjö fyrir vikulok, taka samtölin, skila skýrslunum, sækja börnin, sprikla, halda dauðataki í snjallsímann sem gæti hringt, hrist eða hríslað inn nýjum fyrirmælum sem við að sjálfsögðu fylgjum. Rannsóknir sýna að árátta okkar í að grípa í símann til að taka stöðuna er sterkari fíkn en fíknin í sígarettu. Hvert erum við eiginlega komin á tölvuöld? Hefur tæknin endanlega tekið völdin? Taktu þér tak í góðu tómi og tengdu þig við það sem er þér í raun mikilvægt. Og sinntu þeim málum af ákafa. Láttu hin áreitin eiga sig.

Leiktu hlutverkið til fullsLífið er margbreytilegt. Við lifum og hrærumst í mörgum hlutverkum dagsdaglega. Við erum foreldrar, starfsmenn, íþróttaþjálfarar, stjórnarmenn, dætur, vinir, nemar. Rannsóknir sýna að heilinn nær betur tökum á veruleikanum ef við hugsum skipulega í hólfum, líkt og leikari á sviði. Eitt hlutverk af fullri sannfæringu í einu. Taktu þér stund og skilgreindu þín hlutverk. Takmarkaðu fjölda þeirra við fimm til sjö. Hafðu síðan kjarkinn til að stíga að fullu inn í það hlutverk í hvert sinn sem lífið kallar á það. Hættu að vera öllum allt.

Horfðu til stjarnannaSkoraðu á þig í ár – ekki sætta þig við meðalmennsku. Hverjar eru þínar fyrirmyndir? Hvernig lítur fullkominn heimur út? Ætlar þú að feta í fótspor forgöngumanna eða ætlar þú að teygja þig til stjarnanna og ná þannig til tunglsins? Hafðu kjarkinn til að standa á öxlum þeirra bestu. Settu markið hátt í ár. Í hverju hlutverki. Vertu til fyrirmyndar. Og uppskerðu sem aldrei fyrr!