Asískir tölvuþrjótar herja á já.is

Símnúmerafyrirtækið Ja.is hefur komið sér upp svokallaðri tíðnitakmörkun til þess að verjast árásum tölvuþrjóta.

Það þýðir að ef of margar leitarfyrirspurnir berast síðunni á of skömmum tíma frá sömu IP-tölunni, sem er nokkurs konar kennitala tölvunnar, lokar heimasíðan sjálfkrafa á IP-töluna. Dæmi eru um að uppruni fyrirspurnanna sé í Asíu.

„Það hefur komið fyrir að erlendir aðilar hafi dælt á okkur fyrirspurnum og þá hrundi vefurinn tímabundið,“ útskýrir Hlöðver Árnason, tæknistjóri hjá Já.is.

Hann segir að það komi fyrir að margir séu á bak við sömu IP-töluna hjá einstaka fyrirtækjum. Hlöðver bendir á að þá geri ja.is undanþágur.

Aðspurður segir Hlöðver að dularfullar IP-tölur hafi reynt að komast yfir símanúmer á síðunni. Uppruni þeirra hefur stundum verið óljós, „en svo höfum við séð vafasamar IP-tölur, til að mynda frá Asíu, sem hafa reynt að nálgast mikið magn af upplýsingum frá okkur,“ segir Hlöðver.