Muck voru steyptir í gifs

Þungarokkshljómsveitin Muck spilaði á Listahátíð í gær. Tónleikarnir voru með óhefðbundnu sniði, en á meðan þeim stóð var tónleikarýmið steypt í gifs af hópi gifssteypara. Var þetta gjörningur eftir listamanninn Magnús Pálsson sem fór fram undir stjórn Ragnhildar Stefánsdóttur myndhöggvara. Verkið ber nafnið Einsemd:Steypa, og vísar í lag hljómsveitarinnar, I Stand Alone.

Fórnuðu fötunum



Ási í Muck segir hljómsveitina hafa verið að vinna mikið með einsemdina og að frysta andartök í tónlist. Það sé ákveðin andstæða við þann hasar og hávaða sem einkennir þungarokkið. Gjörningurinn miðaðist við að Muck spiluðu hefðbundið sett í hálftíma og svo tók við rúmlega þriggja tíma ferli af gifsun þar sem hljómsveitarmeðlimir þurftu  að vera grafkyrrir. Ási segir þá félaga hafa passað vel að drekka ekkert fyrr um daginn.

„Við vorum meðvitaðir um að við gætum ekkert skroppið frá í þessa þrjá tíma svo við pössuðum vel upp á þetta. Eins vissum við að við gætum þurft að fórna fötunum sem við vorum í, skórnir voru klipptir af mér og bolir og buxur hurfu inn í gifsið. En það var ekkert mál, við pössuðum bara að vera ekkert í dýrustu fötunum okkar“, segir Ási.

Vilja tvinna tónlistina saman við önnur listform



Meðlimir Muck eru þó sammála um að málstaðurinn hafi verið verðugur. „Við erum rosalega ánægðir með þetta samstarf. Við viljum gera sem mest af því að tvinna tónleikana okkar saman við ádeilu, gjörninga og hin ýmsu listform.“

Hljómsveitin Muck spilar á tónlistarhátíðinni Reykjavík Music Mess næstkomandi laugardag á tónleikastaðnum Volta.