Opið bréf til mennta- og menningarmálaráðherra

Kennarafélag Flensborgarskólans skorar á mennta- og menningarmálaráðherra að beita sér fyrir auknum fjárframlögum til handa framhaldsskólum landsins og endurskoðun á forsendum reiknilíkans þess sem notað er við ákvörðun á fjárframlögum til framhaldsskólanna.

Ljóst er að skólarnir sitja ekki við sama borð að þessu leyti og mikilvægt að leiðrétta þann ójöfnuð sem núverandi kerfi veldur. Í hagræðingu og sparnaði síðustu ára hefur nemendum verið fjölgað verulega í einstaka námshópum og bekkjum. Stórir nemendahópar skerða gæði náms og leiða til þess að nemendur sem eiga við einhverja erfiðleika að stríða eiga erfiðara með að fóta sig í náminu sem aftur leiðir til aukins brottfalls. Þetta fellur illa að stefnu Mennta- og menningamálaráðuneytisins um einstaklingsmiðað nám. Það er jafnframt hrópandi óréttlæti að afleiðing þess að nemendur hrökklist úr námi vegna óviðunandi aðstæðna bitni á fjárframlögum til skólanna.

Ennfremur er það réttlætismál að hagræðing sú sem átt hefur sér stað í framhaldsskólum landsins á undanförnum árum með auknu álagi í starfi kennarans skili sér í bættum kjörum til kennarastéttarinnar og skólastjórnendum sé gert kleift að hækka grunnröðun kennara í gegnum stofnanasamninga og þannig jafna launamun ríkisstarfsmanna.