Sparisjóðaskýrslan frestast enn

Rannsóknarnefnd Alþingis um sparisjóðina mun ekki skila skýrslu sinni fyrr en um mánaðamótin nóvember-desember. Þetta kom fram á fundi formanns nefndarinnar, Hrannars Más S. Hafberg, með forsætisnefnd þingsins í síðustu viku.

„Það er ljóst að verkefnið hefur verið töluvert viðurhlutameira en gert var ráð fyrir í upphafi,“ segir Einar K. Guðfinnsson, forseti Alþingis, í samtali við Fréttablaðið.

Þetta er ekki í fyrsta sinn sem skýrsluskilin eru tímasett. Það hefur raunar verið gert ítrekað og að sama skapi hafa skilin frestast ítrekað. Nefndin var skipuð í lok ágúst 2011 og upphaflega var áætlað að verkið tæki níu mánuði. Í nóvemberlok verða hins vegar 27 mánuðir frá skipun hennar.

Einar segir að nú sé farið að hilla undir lok verksins og því hafi hann trú á því að tímasetningin sem hann fékk uppgefna á fundinum í síðustu viku muni geta staðist.