Horfum til austurs

Einn kaldan en fagran morgun stóð ég við vaskinn og rakaði þykk hárin úr andliti mér. Mér varð litið í spegilinn og samstundis flögraði sú hugsun í huga mér hvað mannskepnan sé grimm. Einelti, heimsstyrjaldir og allt þar á milli eru birtingarmyndir þessa dýrs sem býr í brjósti okkar, sem þráir ekkert heitar en að brjótast fram með heift og ofbeldi. Tilgangsleysi lýsir best stríðinu í Sýrlandi, valdfýsn og kúgunartilburðir. Vesturlönd geta að sjálfsögðu ekki staðið hjá en stefnan er röng. Það er ekki nóg að senda þessar eldfimu bréfdúfur, flugskeytin, á Assad einvörðungu. Að sjálfsögðu þarf að sprengja báðar hliðar til jafns.

Myndbandsupptaka af uppreisnarmönnum sem leggja sér mannshjarta til munns hefur vakið mikla reiði meðal almennings en Obama og félagar sjá ekkert athugavert við það. Þessum mönnum þurfa þeir að koma til varnar. Rússneski steinþursinn Vladimír Pútín hefur í þessum deilum risið eins og fönix úr ösku brenndra hermanna og stendur í vegi fyrir loftárásum Bandaríkjamanna við litla hrifningu Bandaríkjastjórnar. Þessi friðarhugsun hr. Pútíns fær mann til að hugsa hvort það væri ekki betra ef Sigmundur Davíð byði honum í heimsókn hingað á land, í stað Obama, þar sem þeir gætu skipst á skópörum og rætt um frið og mannréttindi.

Það er lítið sem truflar friðinn hér á landi ísa annað en vindurinn sem klórar í glerið og stöku köttur sem breimar. Þegar íslenskt barn missir bolta sinn út á götu er helsti óvinurinn brjálaðir ökumenn borgarinnar. Í Sýrlandi er helsta ógnin hins vegar fjarstýrð morðtól Bandaríkjastjórnar. Í Utah sitja þeir með stýripinna og franskar. Slíkir menn munu aldrei skilja þá mannlegu eymd sem býr þarna á bak við. Fyrir þeim gætu þeir allt eins spilað eitthvert tölvuspil. Kæru Íslendingar, hendur okkar eru blóði drifnar. Við þurfum að slíta stjórnmálasambandi við Bandaríkjastjórn strax í dag!