Síðasti séns

Í dag, 23. maí, rennur út frestur til að gera athugasemdir við nýtt deiliskipulag um Austurvöll, Fógetagarð og Ingólfstorg. Ég hvet þig, lesandi góður, til að senda inn athugasemdir við téð skipulag af eftirtöldum ástæðum. Borgarstjórn hefur hunsað vilja tæplega 17.000 íbúa, eða um 20% kosningabærra Reykvíkinga, sem mótmæltu þessu fyrirkomulagi með undirskriftum á vefsíðunni ekkihotel.is.

Þess vegna er mikilvægt að sem flestir mótmæli eftir formlegri boðleiðum skrifræðisins með vefpósti á skipulag@reykjavik.is sem gefur að sjálfsögðu færi á athugasemdum þegar málefni eins og alþingiskosningar og stjórnarmyndunarumræður fá meginþorrann af kastljósi fjölmiðla. Komi skipulagið til framkvæmda mun skuggavarp á Austurvelli aukast og þrengt verður verulega að almenningsrýmunum þar og á Fógetagarði og Ingólfstorgi.

Gamlar og sögufrægar byggingar verða yfirgnæfðar af stærri húsum í allt öðrum stíl. Nasa-salurinn, sem á sér gríðarlega merkilega sögu og var einn besti tónleikastaður landsins, mun einnig hverfa en húsafriðunarnefnd hugðist vernda hann en hætti við vegna hótana lögfræðinga eigenda hússins. Í því og þessu skipulagi kristallast vandamál sem lengi hefur hrjáð borgarpólitíkina, að menning og mannlíf er alltaf látið lúffa fyrir verktökum og auðvaldi. Annað nýlegt dæmi um slíkt er að rífa á annan tónleikastað, Faktorý, og þrengja verulega að Hjartagarðinum til að byggja enn eitt hótelið.

Það er fullkomlega galin forgangsröðun að byggja hótel á hverjum einasta fersentrimetra miðborgarinnar og hrekja í burtu þá starfsemi og umhverfi sem gerir það á annað borð eftirsóknarvert að gista og búa þar. Þrátt fyrir að aukning ferðamannastraums til Íslands undanfarin ár sé jákvæð þróun þá virðist læmingjahugarfar fjárfesta þjóðarinnar gera ráð fyrir því að hann haldi áfram að aukast um ókomin ár og þess vegna verði að troða eins mörgum eggjum og mögulegt er í eina agnarsmáa hótelkörfu. Borgaryfirvöld ættu ekki að ýta undir þessa þróun.

Borgarfulltrúar ættu að gæta hagsmuna almennings en ekki verktaka. Að auðmenn geti keypt upp hús á mikilvægum reit í hjarta borgarinnar og notað sem þumalskrúfu á stjórnmálamenn til að fara sínu fram og gerbreyta ásýnd svæðisins er algjörlega óásættanlegt. Ég hvet alla sem á stafrænum penna geta haldið og er annt um að menning og almannarými í miðbænum verði tekin fram yfir hagsmuni auðvalds til að senda athugasemdir við deiliskipulagið á skipulag@reykjavik.is í dag. Það er síðasti séns og það skiptir máli.