Rannsókn á morði á Litla Hrauni lokið

Rannsókn lögreglunnar á Selfossi á andláti Sigurðar Hólm Sigurðssonar á Litla Hrauni þann 17. maí í fyrra er lokið. Fanginn lést í klefa sínum og grunar lögregluna að honum hafi verið ráðinn bani. Áður hefur verið greint frá því að grunur leiki á að þar hafi Annþór Kristján Karlsson og Börkur Birgisson verið að verki. 

Málið hefur nú verið sent ríkissaksóknara til meðferðar. Lögreglan segir í tilkynningu að rannsóknin hafi um margt verið flókin og frá upphafi hafi verið ljóst að ekki yrði að vænta samvinnu þeirra tveggja sakborninga sem grunaðir eru um að hafa valdið áverkum sem leiddu manninn til dauða. Í þágu rannsóknarinnar hafi verið leitað til ýmissa sérfræðinga um úrlausn tiltekinna atriða. Réttarmeinafræðingur hafi verið dómkvaddur til að fara yfir þau gögn sem urðu til við krufningu líksins auk annarra þátta sem varði áverka þá er leiddu til dauða mannsins.  

Þá voru tveir prófessorar í sálfræði dómkvaddir til að greina atferli fanga á upptökum úr öryggismyndavélum. Prófessor í verkfræði við HÍ var fenginn til að rannsaka þá krafta sem þarf til að valda þeim áverkum sem voru á líkinu. Hann mun skila skýrslu sinni til ríkissaksóknara á næstunni. Sérstakar mælingar voru gerðar á hljóðburði innan fangelsins og möguleikum vitna á að heyra það sem talið er hafa farið fram innan veggja fangaklefa hins látna.  Þá var nákvæm eftirlíking klefans byggð í fullri stærð í húsnæði Lögregluskóla ríkisins þar sem tæknideild högreglu höfuðborgarsvæðisins sviðsetti mögulega atburðarás auk þess sem grunuðum var gefinn kostur á að lýsa atvikum í klefanum þar.

Fjöldi vitna hefur nú þegar verið leiddur fyrir dóm og borið þar vitni undir nafnleynd en vitnin hafa talið að framburður þeirra um málavexti gæti sett þau í hættu á að þeim verði unnið mein vegna hans.

Rannsóknin hefur verið tímafrek en gengið vel, að sögn lögreglu.  Ríkissaksóknari mun nú yfirfara málsgögn og eftir atvikum kveða á um frekari rannsókn einstakra þátta, telji hann þörf á því og taka málið síðan til ákærumeðferðar í samræmi við ákvæði sakamálalaga.